Atassut Pele Brobergip naalagaaffeqatigiinni suleqatigiinnerit pillugit oqaasiinut isumaqataanngitsoq
Naalakkersuisut Danmarkimit sakkutuut nunatsinniinnerannut, nunatta innuttaasuinut illersornissamut ilinniarfimmut, Issittumi piginnaasat annertusarnissaannut isumaqatigiissummut Issittumullu periusissiornermut assortuinerat Atassutip isumaqatiginngilluinnarpaa.
AAMMA ATUARUK Naalakkersuisut dumper forsvarsaftale til 1,5 milliarder
Nunanut allanut naalakkersuisup Pele Brobergip (N) naalagaaffeqatigiinnut naalagaaffeqatigiillu suleqatigiinnerannut oqaatsinik sakkortusinnaasunik naalakkersuisuunermi aallartinnerani atuinera Atassutip siulittaasuata Aqqalu Jerimiassenip ernumanartippaa.
- Tatiginassusitta qanoq innera aallaqqaataani eqqarsaatigisariaqarparput. Nunanut allanut naalakkersuisoq nipimik allanngorartumik taama sakkortutigisumik oqariartortarniartillugu qanoq sunniuteqarnerlussinnaanera eqqummaariffigisariaqarpoq, Aqqalu Jerimiassen oqarpoq.
Naalakkersuisoqatigiinniinnginnermut pissutaasoq
Maanna suliatut ittut pissutigalugit naalakkersuisoqatigiinnut ilaanatik Aqqalu Jerimiassenip erseqqissaatigaa.
- Teknikkikkut maannakkut suleqataavugut, taama oqaraanni.
- Naalakkersuisoqatigiinnut tunuliaqutsiisuuvugut naalakkersuisoqatigiinnut toqqaannaq ilaanata, annerpaamik peqqutaanerulluni, naalagaaffinngornissamut suliniuteqarnermut iisassat annertuallaartut uagut peqataaffigisinnaannginnatsigit. Taavalu Atassut Issittumi illersornissamut pitsanngorsaanissamut pingaartitsisuuvoq, ilaatigut sakkutuujusussaatitaanermut tunngatillugu, Atassutip siulittaasua oqarpoq.
AAMMA ATUARUK Issittumut periusissiaq pillugu politikikkut anneruniunnerit sivitsortut
Taamattaarlu nunatsinni illersornissamut ilinniarfeqarfiit nunatsinni inerisarnissaannut suliniuteqarnissamut tapersersuisuugatta.
Naalakkersuisut siulii Siumumit siuttuuffigineqartut Kangerlussuarmi ilinniarfeqarfinnik pilersitsinissamut danskit naalakkersuisuinik isumaqatigiissuteqarput.
Taakkulu maannakkut itigartinneqassappata periarfissatsialaagaluartumik itigartitsisoqassasoq, Aqqalu Jerimiassen isumaqarpoq.
- Nunatta iluaqutigisinnaagaa aamma nalunngilarput. Illersornissakkut ilinniartitaaneq aallukkutsigu ilinniarsimasortatta sineriapput paarisinnaalissagaat takusinnaalissavarput.
Naalakkersuisoqatigiinnut ikorfartuisuuginnassasut
Atassulli nunanut allanut tunngasunut politikki pillugu oqaaserisat iluarinngikkaluarlugit naalakkersuisoqatigiinnut ikorfartuiinnassasoq, Aqqalu Jerimiassen oqarpoq.
AAMMA ATUARUK Broberg: Danmark Savalimmiullu Issittumut periussialioqatiginiarpaatigut - killormuunngitsoq
- Naalakkersuisoqatigiit isumaqatigiissutaat malillugu suliniutit allat Atassummiillu isumaqataaffigisagut qulequttat assigiinngitsut malillugit aallartinnerat ajorinngilarput. Unali ataaserluinnaq avammut maannakkut taama inissisimasoq isumaqataanngilluinnartutut inissisimaffigaarput, Aqqalu Jerimiassen oqarpoq.