Atassut: Palle tunuarniarit
Tamanna pillugu Atassutip siulittaasuata Ilinniartitaanermut Naalakkersuisoq tunuaqqullugu piumaffigaa.
- Inuiaqatigiinnut Inatsisartunullu Naalakkersuisunut ilaasortat salluunngitsumik oqaluttussaatitaaneri ministerit akisussaatinneqarsinnaanerinik inatsimmi allassimavoq. Tassalu Naalakkersuisunut ilaasortat salloqqusaanngillat, Atassutip siulittaasua, Gerhardt Petersen tusagassiutinut nalunaarummini allappoq.
- 2009-mi qinersinerup kingorna Palle Christiansen inuiaqatigiinnut Inatsisartunullu salluunngitsunik oqaaseqartarnissani ajornartorsiutigisimaqaa, tamannalu kinguneqartinneqartarsimanngilaq, Gerhardt Petersen allappoq.
Palle Christiansenimut assuarinninneq aallartippoq, taanna oqarmat meeqqat atuarfiini ilinniartitsisut atuartitsinerminnut taamaallaat akunnerit suliffiusut 28 procentii atortaraat, Danmarkimi ilinniartitsisut atuartitsinerminnut piffissaq 40 procenti atortagaat naleqqersuunneqarluni.
IMAK-ip isornartorsiuinermini oqaatigaa, tamanna kisitsisinik allanngortitsinerusimasoq, tassalu Atassut taama isornartorsiunermut isumaqataalluni nalunaarpoq.
Kisitsisit Palle Christiansenip oqaatigisai eqqunngitsut IMAK-ip uppernarsaatissaqartikkai Atassutip isumaqataalluni nalunaarutigaa.
- Ministerit akisussaatinneqarsinnaanerinik inatsit unioqqutinneqarsimavoq. Nunami inatsit tunngavigalugu naalakkersorneqartumi oqartussaasoq eqqunngitsuliortoq tunuartinneqarsinnaavoq eqqartuunneqarlunilu. Nunarput inatsisinik tunngaveqartoq atortunnaarsinneqarsimanersoruna?, Gerhardt Petersen aperivoq.
IMAK-ip ilaasortaasa akissarsiaannik isumaqatigiinniarnissaq Naalakkersuisunit piaaralutik kinguarsarneqartoq Atassutip siulittaasuata pasitsaappaa.
IMAK-imut isumaqatigiissut kingulleq atuukkunnaarpoq siornaak 2010-mi marsip 31-anni, tassalu taamanerniit isumaqatigiinniartoqalerluni.