Atassut: Namminerisamik najugaqarsinnaaneq IA-kkut unitsinniarpaat
Namminerisamik inigisamik piginnittuuneq aningaasanik ileqqaarnertut aamma taaneqarsinanavoq. Taamaattut Inuit Ataqatigiit aamma Demokraatit siunnersuutaat malillugu tamanna ajornakusoornerulertussaavoq. Steen Lynge Atassummeersoq taama nalunaarpoq.
- Isumaqarpunga sapinngisamik amerlasuut nammineq sipaagaqarnissamut periarfissinneqassasut. Sipaakkat taakku atorneqarsinnaapput arlaannut aningaasaliiniarnermut imaluunniit inuiaqatigiit iluanni nalilinnik pilersitsinikkut utoqqalinermi imminut isumalluusertoqarsinnaalluni. Taamatut sipaagaqarneq qulakkeerneqarsinnaavoq amerlasuut angerlarsimaffigisamik piginnittuulerpata, Steen Lynge KNR-mut nalunaarpoq.
Aningaasaqarnermut naalakkersuisoq Maliina Abelsen siunnersuummik saqqummiussigami oqarpoq akileraartarnermi ilanngaatit appaallanneratigut naligiinnerulertoqarsinnaasoq. Tamannali Steen Lyngep ilumuunnginnerarpaa isumaqarpormi akerlerluinnaanik pisoqassasoq.
- Ilanngaatit atorunnaarpata tamanna equngasumik eqquissaaq. Tassami illoqarfinni akisuunik illuutillit marloriaammik sakkortunerunerusumik eqqugaassapput illoqarfinni akikinnerusunik illulinnut sanilliullugu. Taamaammat isumatusaarnerussaaq ilanngaatit allanngortinnagit sipaagaqarnissamut periarfissinneqartuuppata tamannalu nunatsinni aningaasaqarniarnermut iluaqutaassaaq, Steen Lynge allappoq, taamaattoq nalunaarummini allannagu suut nalilinnik pilersitsissutaasinnaanersut.
