Atassut motorcykkilerusuummerpoq
![](/sites/default/files/styles/image_934x467/public/article_images/motorcykel630_0.jpg?itok=8bNP9Qs3)
Atassut isumaqarpoq motorcykkilit eqqunneqarsinnaaleqqinnissaannut piffissanngortoq. Taamaattumik siunnersuutigaat eqqussinissamut inerteqqut 1980-meersoq atorunnaartariaqartoq. Tamanna aamma landskarsip isertitsissutigilaarsinnaagaa unnerpaat.
Motorcykkilit nunatsinnut eqquteqqusaajunnaarput peqqarniitsumik atorneqarnerat pissutaalluni. Atassulli isumaqarpoq motorcykkilit eqqunneqarsinnaanerat akuerineqarsinnaaluartoq snescooterit aammalu sukkalisaarutaasaqisut akuerineqarsinnaappata.
Atassutip Inatsisartunut siunnersuutigaa motorcykkilinik ingerlatitsisinnaasut minnerpaamik 25-nik ukioqarnissaat piumasaqaataassasoq. Aamma siunnersuutigaat motorcykkilit eqqunneqarsinnaasut angissusaat 250 kubik-imut killilerneqassasut ullumikkut motorcykkilit 2.000 kubik angullugu angissuseqartaraluartut. Siunnersuummi tunngavilersuummi allapput taamaasiornikkut peqqarniitsumik sukkalisaartarnerit killilersimaarneqarsinnaasut.
Atassut sinnerlugu Inatsisartuni ilaasortat Siverth K. Heilmann aamma Knud Kristiansen isumaqarput eqqusseqqusinnginnerup atorunnaarsinnera inuiaqatigiinnut aningaasartuutaanavianngitsoq. Illuanilligooq isertitsissutaalaarsinnaavoq motorinut akitsuutit aamma eqqussinermut akitsuutit eqqarsaatigalugit.
Siunnersuut inatsisartut oqaluuserissavaat ataasinngorneq oktoberip qulingat.