Atassut ataannarumalluni sukataassaaq
Atassutip siulittaasuata kommunalbestyrelsemut Inatsisartunullu ilaasortaannginnera Atassutip ullumikkut inissisimanerlunneranut pissutaaqataasoq, siulittaasup Gerhardt Petersenip nassuerutigalugu oqaatigaa.
- Arlaleriarlugu oqaatigeriikkattut oqaatigeqqissavara, ilumullimi Inatsisartunut ilaasortat imaluunniit kommunalbestyrelsmut ilaasortat ilaat Atassutip siulittaasuatut sassarsimagaluarpat uanga sassarsimassanngikkaluarpunga, kisiannili tassa taamaattoqarsimanngilaq. Maanna aalajangerpunga kommunalbestyrelsimut qinersisoqarnissaanut sassarniarlunga aamma Inatsisartunut qinersisoqalerpat sassassaanga, Gerhardt Petersen oqarpoq.
1979-imi Inatsisartunut qinersisoqarmat partiit pingasut qineqqusaartitsipput tassaasut Atassut, Siumut aamma Inuit Ataqatigiit. Taamani Atassummit qinigaapput politikerit arfineq pingasut, Siumut 13-inik qinigaatitaqartoq Inuit Ataqatigiillu qinigaatitaqanngitsut.
Qinersinermi tullermi tassalu 1983-imi, Atassut partiinit annersanngorluni qinersisartut 46,6 procentiinit taaneqarpoq, Siumut taamaallaat 42,3-nik taaneqarluni.
Kalaallit Nunaata naatsorsueqqissaartarfiata kisitsisaatai naapertorlugit, Atassut Siumullu 1980-ikkut naanissaata tungaanut qinerissartunit nuannarineqarnerpaapput.
1990-ikkulli aallartiinnartut Atassutip qinersisatui ikiliartuinnavipput, kingullermillu Inatsisartunut 2009-mi qinersisoqarnerani, Atassut qinerseqataasut taamaallaat 10,9 procentiinit taaneqarpoq. Taamani qinersinerup kingorna Atassutip Inatsisartuni issiatiligai pingasuinnanngorput. 2010-mili marluinnanngorput, Finn Karlsenip Siumumut nuunnerata kingorna.
Atassut ukiuni kingullerni qinersisartunit utoqqarnit taaneqarnerusarpoq. Atassut qallunaanit 1980-ikkunni nuannarineqarneruvoq, tamatumunnga pissutaalluni partiip Danmarkimut ataannarnissamik politikkeqarnera.
Qallunaanit taasisartunit Atassut ukiuni kingullerni qimanneqarsimavoq, taakku Demokraatinik Inuit Ataqatigiinnillu taasinerusalersimammamata.
Atassutip qinersisartunit tununneqarnera aamma kommunalbestyrelsemut taasinerni takuneqarsinnaavoq. 1983-imi kommunalbestyrelsemut qinersisoqarmat Atassut taamani 44,1 procentinik taaneqarpoq, 2008-mi 15,3 procentinik taaneqartoq.
