Ataatsimut isigalugu: Toqutsinerit pillugit suliani sisamani tamani pasineqartunik tigummigallaasoqartoq

Ukioq 2023-p aallartinnera peqqarniippoq. Toqutsinerit pillugit suliat sisamat Kalaallit Nunaanni Politiit suliaraat – taakkunannga pingasut ullut qulit tassa januaarip 31-anit februaarip arfineq-pingajuanut toqutsinerupput.

Tamatuma saniatigut inummik toqutsisimanerminik politiinut nalunaarutiginnittoqarput. Politiit suliaq arnamut Qaqortumi ukiup ataatsip affaatalu matuma siorna tammaaneqalertumut attuumassuteqarnersoq misissuiffigaat. Tassa imaappoq ujaasinermik suliaq toqutsisoqarnerani suliatut maanna aatsaat misissuiffigineqalerpoq.

Toqutsinerilli sisamat imminnut attuumassuteqanngitsut, politiit erseqqissaatigaat. Tassanilu ataatsimut assigiittoqarpoq: Politiit suliani tamani pasineqartunik tigusarinnipput, pasineqartullu eqqartuussisumit tigummineqarallartussanngortinneqareerput.

Januaarip 31-anni

arnaq 82-inik ukiulik Nuummi Ceresvejimi inigisamini toqutaasimasoq nassarineqarpoq. Taanna niaqqumigut sakkortuumik arlaleriarlugu anaalerneqarsimavoq. Pinerluuteqartoq tamatuma kingorna arnap inigisaa nalilinnik ujaasiffigeriarlugu ikuallatsippaa. Angut suliamut atatillugu tigummigallarneqareerluni iperagaanikuuvoq suliamili suli pasisaaqqalluni.

Suliamut atatillugu aatsaat siullermik februaarip qulingani pingaarutilimmik paasisaqartoqarpoq. Angutit marluk kilisaammik Nuummut tikikkamik umiarsualivimmi ualikkut tigusarineqarput. Angutip aappaa erngertumik iperagaaqqippoq, aappaali – angut 20-nik ukiulik – Eqqartuussisoqarfik Sermersuumi arfininngormat passartinneqarpoq, taannalu toqutsisimasutut, ikuallatsitsisimasutut timimullu iliuusissaanngitsumik iliuuseqarsimasutut pasineqarluni. Taanna ulluni 26-ni tigummigallarneqartussanngortinneqarpoq.

AAMMA ATUARUK Nuummi toqutsisoqarnerani suliaq: Politiit pingaaruteqartumik paasisaqartut

Politiit suliamut atatillugu arlalinnik pinerluttoqarsimasinnaanera mattutinngilaat.

- Matut tamarmik ammatippagut, Kalaallit Nunaanni Politiit allaffeqarfiani pisortaq, Emil Maegaard-Hoffmann KNR-imut oqarpoq.

- Paasissutissat tamarmik uppernarsarneqarnissaannut suliassarujussuaqarpugut. Teknikkikkut misissoqqissaagassat inernerisa akissutersinissaat aamma utaqqisaapput.

Februaarip 4-aanni

angut 54-inik ukiulik Qaqortumi J. H. Lytzensvejimi inigisamini toqutaasimasoq nassaarineqarpoq. Angutip toqqutigisaa saqqummiunneqanngilaq.

Taanna qangarpiaq toqusimanersoq erseqqissumik oqaatigineqarsinnaangilaq, kisianni toqutsineq tallimanngornerup ualikkuata arfininngornerullu ullaavata akornanni pisimassangatinneqarpoq.

AAMMA ATUARUK Angut 34-nik ukiulik Qaqortumi toqutsinermi suliami tigummigallarneqartussanngortoq

Angut 34-nik ukiulik suliamut atatillugu tigummigallarneqarpoq.

Taanna Eqqartuussisoqarfik Kujallermi sassartinneqarpoq, taassumalu ulluni 28-ni tigummigallarneqarnissaa eqqartuussisup aalajangerpaa. Angut toqutsisimasutut pasineqarpoq.

Februaarip 8-aat unnukkut kingusissukkut

arnaq 55-inik ukiulik Sisimiuni savimmik kapineqarluni toqutaavoq. Taanna tuaviortumik napparsimmaviliaanneqarpoq, annaanneqarsinnaananili. Taanna toqusimasutut nalunaaqutaq 21.30 nalunaarutigineqarpoq.

AAMMA ATUARUK 25-nik ukiulik ulluni 28-ni tigummigallagassanngortinneqartoq

Arnaq 25-nik ukiulik nalunaaqutaq 22.20-nngortoq tigusarineqarpoq.

Taanna Eqqartuussisoqarfik Qeqqani sisamanngornermi sassartinneqarami ulluni 28-ni tigummigallagassanngortinneqarpoq. Taannalu toqutsisimasutut pasineqarpoq.

Suliat sisamaat

2021-mi novembarip 22-anut atassuteqarsinnaavoq. Ulloq taanna arnaq 35-nik ukiulik Qaqortumi tammaaneqalerpoq. Politiit, qatserisartut, issittumi sakkutooqarfik, namminerlu kajumissutsiminnik ujaaseqataasut ujaasigaluarput, iluatsinngitsumilli. Taanna kingullermik novembarip 22-ani  Kommune Kujalliup allaffiata silataani unnukkullu Brugseneeqqap eqqaani takuneqarpoq.

Politiit suliamut tassunga atatillugu paasissutissanik iluamik oqaatiginninngillat.

Angulli 35-nik ukiulik nammineerluni politiinukarluni toqutsinerminik nassuerutiginnissimavoq. Politiillu tamanna tammaasaqartoqarneranut suliamut attuumassuteqarnersoq misissorlugu taamaallaat oqaatigaat.

AAMMA ATUARUK Angut 34-nik ukiulik Qaqortumi toqutsinermi suliami tigummigallarneqartussanngortoq

Politiit Qaqortumi Vatikanbakkenip eqqaani nunami assaapput. Politiillu sooq assaanerlutik oqaatigerusunngilaat – taamaallaalli assaaneq suliamut attuumassuteqarnerarlugu.

Angut imminut nalunaarutigisoq – Eqqartuussisoqarfik Kujallermi sisamanngornermi sassartinneqarpoq, taannalu toqutsisutut pasineqarluni ulluni 28-ni tigummigallagassanngortinneqarpoq.

Kalaallit Nunaanni Politiit nunatsinni toqutsinerit arfinillit siorna nalunaarsorpaat. Ukiumut toqutsinerit agguaqatigiissillugit tallimaasarput.