Bussinik angallassineq pilersaarutitaami taaneqatsiaannartoq: Ataatsimiititap siulittaasua tamanna pillugu oqaaseqarpoq

Nutaanik aqqusinniornissaq Nuummi angallanneq pillugu pilersaarutitaami siunniussaavoq. Bussilli angallassineq pillugu pilersaarutitaami taaneqatsiaannarput. Illoqarfimmik ineriartortitsinermut sanaartornermullu ataatsimiititap siulittaasua Nuummi bussinik angallassinerup siunissami isikkussaa pillugu maanna oqaaseqarpoq.
Justus Hansen trafik
Amerlanerusut bussertalernissaannut iliuuseqartoqarnerusariaqartoq, iliuuseqarnerunerli kommunimut aamma akisussasoq, Kommuneqarfik Sermersuumi kommunalbestyrelsip illoqarfimmik ineriartortitsinermut sanaartornermullu ataatsimiititaata siulittaasua Justus Hansen (D) oqarpoq. Assi © : KNR / Johansinnguaq Olsen
Allattoq Markus Valentin
oktobarip 24-at 2024 15:04
Nutserisoq Hanne Petersen

Sulisut meeqqatik soraareernerup kingorna aariarlugit angerlamut iggaseriartorniarlutik imaluunniit sunngiffimmi allamilluunniit sammisaqariartorniarlutik angallateruttulerput.

Biilinilli angallattut siuleriiaallutik ingerlaqqinnissamut aamma utaqqerrapput. Sutigummi tamatigut tassa angallateruttulerfiuvoq.

Angallannermik pilersaarutitaaq Kommuneqarfik Sermersuumi kommunalbestyrelsip ataatsimiinnerani kingullermi saqqummiunneqarpoq – pilersaarutitaaq taanna Nuup qiterpasissuata qinnguatalu (Qinngorput, aaqq.)) akornanni angallateruttulerfiusartut sivikinnerulernissaannut isumannaannerulernissaannullu iliuusissatut pilersaarutaavoq.

NUUMMI ANGALLANNERMI AJORNARTORSIUTIT NAATSUMIK

Nuummi angallassissutit motoorillit 2.385-inik 2007-miit 2023-mut amerlipput. Tassa 90 procentit sinnilaarlugit amerleriaateqarput.

Tamanna angallassissutit motoorillit ullaakkut ualikkullu siuleriiaarrallutik angallateruttulertarneranik kinguneqarpoq.

Nuummi biilerneq pisariinneruleqqullugu kommuni suliniutinik qulinik 2030-p tungaanut ukiut ingerlaneranni piviusunngortikkiartuaagassanik pilersitsivoq.

Suliniutit pilersitai ilaatigut Nuup ilaani Nuussuarmi sullorsuup neruttornissaanut, aqqusinermi qulliit angallannermi najoqquutaasunik iluarsaannissaannut, nutaanik pisuinnarnut aqqusinniornissanut Nuummilu illoqarfiup ilaasa akornanni nutaanik aqqusinniornissanut tunngasuupput.

Nuummili biilerneq pisariinnerulerpat, tamanna angallannermi ullutsinni ajornartorsiutit siunissami ajornartorsiutaaginnarnerannik kinguneqartumik biilit amerleqqeriaannarnerannik kinguneqarsinnaavoq.

Taamaammat bussinik angallassinermi pitsanngorsaanissamut aningaasaliisoqarnissaa, Kommuneqarfik Sermersuup sanarfinermut avatangiisinullu ingerlatsiviata Danmarks Tekniske Universitetip misissueqqissaarneranit nalunaarusiaq 2023-meersoq tunngavilersuutigalugu innersuussutigaa.

Kisianni angallanneq pillugu pilersaarutitaami suliniutit bussinik angallassinermi pitsanngorsaanissamut tunngasortaqanngillat.

Allisiguk

Bussinilli angallassinermi pitsanngorsaanissaq pilersaarutitaami siunnersuutigineqanngilaq. Nuummili angallannermi ullutsinni ajornartorsiutit siunissami ajornartorsiutaaginnaqqunagit tamatumani pitsanngorsaanissaq pingaartuuvoq.

Kommuneqarfik Sermersuup sanarfinermut avatangiisinullu ingerlatsivianeersut Danmarks Tekniske Universitetip misissueqqissaarneranit nalunaarusiaq 2023-meersoq tunngavilersuutigalugu taama oqarput.

Bussinik angallassineq taaneqatsiaannartoq

Bussinik angallassineq kommunip attaveqaasersuinissamik pilersaarutaani immikkoortumi pisuinnaat aqqutaannut tunngasumi ataasiarluni taaneqarpoq.

Orneriaannaanerusunik bussinut utaqqisarfeqalernissaa anguniarlugu kommuni nutaanik, pitsaanerusunik qaammaqqusersukkanillu pisuinnarnut aqqusinniulersaarpoq.

- Mingutsitsinnginnerulernissamut allanngoriartortitsinerup ilaatut biilit uninngatiinnarnissaat orniginarnerulersissavarput. Taamatut iliussaagut pitsaasunik aqqusineeraliornikkut Nuummilu pisortat kikkunnut tamanut ingerlassissutaasa ajornannginnerusumik atorneqarsinnaasunngortinneqarnerisigut, kommuni pilersaarusiornermi periusissamini 2023-meersumi allappoq.

Justus Hansen, Demokraatit
Nuummi bussinik angallassinerup siunissami isikkussaanik siunnersuutit kommunalbestyrelsimi oqaluuserisimagitsik, Justus Hansen (D) oqarpoq. Siunnersuutilli piviusunngortinnissaannut qanoq aningaasalersuisoqassanersoq aalajangiiffigineqaqqaassaaq. Assi © : KNR / Markus Valentin

Justus Hansen (D) kommunip iIlloqarfimmik ineriartortitsinermut sanaartornermullu ataatsimiititaani siulittaasuuvoq. Taanna bussinik angallassinerup pilersaarutitaami taaneqatsiaannarnera siunissamilu qanoq isikkoqarsinnaanera pillugit maanna isummerpoq.

Silap pissusiata allanngoriartornerata kinguneri nunatsinni malugineqarsinnaallutillu ersipput. Biilinik angallattut ikinnerulersinniarlugit amerlanerusut bussertalernissaannut qanoq iliuuseqalersaarpisi?

-  Kommunip akiligaanik tamat akeqanngitsumik bussersinnaalernissaat kommunalbestyrelsimi sulissutigaarput. Bussilli aamma anngutikulanerusalernissaat amerlinissaallu, Justus Hansen oqarpoq.

Busserneq ilorrisimaarnarnerusoq akeqanngitsorlu

Nuummi busserneq utoqqarnut 16-iliisimanngitsunullu akeqarunnaarmalli bussertartut amerlipput. Tamanna kommunimut ukiumut 6 millionit koruuninik akeqarpoq.

Bussernerulli allanut akeqarnera akissarissaanerusut bussertannginnerannut pissutaagunarnani bussernerulli ilorrisimaarnarnerusinnaanerali pissutaagunartoq, misissueqqissaarnermi paasinarsivoq.

Busserneq qanoq ilorrisimaarnarnerulersinneqarsinnaanersoq eqqarsaatiginikuuisiuk?

- Naagga, tamannarpiaq eqqarsaatiginikuunngilarput. Bussilli amerlinerisigut ingerlaakulaarnerunissaat immaqalu unnuakkut ingerlaartalernissaat siunnersuutigilersaarparput. Bussimmi annguteriaannaalersinnaanngornissamut minutsit qulikkuutaartalerunik busserneq ilorrisimaarnarnerulertussaassaaq.

- Bussinulli utaqqinerup orniginarnerulernissaannut bussinut aqquserngit naapiffiini utaqqisarfilersuinikkut taakkua amerlinissaat aamma isumaliutigaarput.

Isumassarsiat siunnersuutillu erseqqissut

Qanoq iliuuseqarnissamut kissaaterpassuugaluartut suli erseqqissunik siunnersuuteqartoqanngilaq.

Erseqqissumik qaqugu siunnersuuteqartoqarnissaa innuttaasut naatsorsuutigisinnaavaat?

- Tassa aqqusinermi qulliit angallannermi najoqqutassartaassat bussertartut amerlanerulernissaannut iluaqutaaqqullugit bussinik apuuttoqaliivinneranik ersitsisartulersorneqarnissaat oqaluuseraarput.

- Angallanneq taamaalilluni isumannaannerulerniartussaassaaq.

Suliniutilli taakkua piviusunngortinnissaat akisussasoq, Justus Hansenip aamma oqaatigaa.

- Eqalugalinnguani aqqusinermi qulliit angallannermi najoqqutassartaassalersuineq 7 millionit koruuninik akeqassangatipparput. Aningaasarpussuupput, aningaasammi tamatumunnga atugassat amerlanngereermata. Siunnersuutilli piviusunngortinneqassanersut missingersuutit pillugit tulliani isumaqatiginninniarnitsinni oqaluuserisassatsinnut immaqa ilanngussinnaavarput.

Nuummi bussinik angallassinermi pitsanngorsaanissamik siunnersuuterpassuit piviusunngorumaarnersut piffissap takutikkumaarpaa.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk

Told

Politiit ullormut nalunaarutaat: Timmisartorsuaq Danmarkimiit nunatsinnut ippassaq missimalersoq arnat marluk katillugit 4,4 kg. hashimik nassartut tigusarineqarput.

Aima Jensenimut alloriaqqinneq tassaasinnavoq Siriuspatruljen

Ullumi Georgienimiut qinersippata EU imaluunniit russit peqatigissaneraat paasinarsissaaq.