Bussinik angallassineq pilersaarutitaami taaneqatsiaannartoq: Ataatsimiititap siulittaasua tamanna pillugu oqaaseqarpoq
Sulisut meeqqatik soraareernerup kingorna aariarlugit angerlamut iggaseriartorniarlutik imaluunniit sunngiffimmi allamilluunniit sammisaqariartorniarlutik angallateruttulerput.
Biilinilli angallattut siuleriiaallutik ingerlaqqinnissamut aamma utaqqerrapput. Sutigummi tamatigut tassa angallateruttulerfiuvoq.
Angallannermik pilersaarutitaaq Kommuneqarfik Sermersuumi kommunalbestyrelsip ataatsimiinnerani kingullermi saqqummiunneqarpoq – pilersaarutitaaq taanna Nuup qiterpasissuata qinnguatalu (Qinngorput, aaqq.)) akornanni angallateruttulerfiusartut sivikinnerulernissaannut isumannaannerulernissaannullu iliuusissatut pilersaarutaavoq.
Bussinilli angallassinermi pitsanngorsaanissaq pilersaarutitaami siunnersuutigineqanngilaq. Nuummili angallannermi ullutsinni ajornartorsiutit siunissami ajornartorsiutaaginnaqqunagit tamatumani pitsanngorsaanissaq pingaartuuvoq.
Kommuneqarfik Sermersuup sanarfinermut avatangiisinullu ingerlatsivianeersut Danmarks Tekniske Universitetip misissueqqissaarneranit nalunaarusiaq 2023-meersoq tunngavilersuutigalugu taama oqarput.
Bussinik angallassineq taaneqatsiaannartoq
Bussinik angallassineq kommunip attaveqaasersuinissamik pilersaarutaani immikkoortumi pisuinnaat aqqutaannut tunngasumi ataasiarluni taaneqarpoq.
Orneriaannaanerusunik bussinut utaqqisarfeqalernissaa anguniarlugu kommuni nutaanik, pitsaanerusunik qaammaqqusersukkanillu pisuinnarnut aqqusinniulersaarpoq.
- Mingutsitsinnginnerulernissamut allanngoriartortitsinerup ilaatut biilit uninngatiinnarnissaat orniginarnerulersissavarput. Taamatut iliussaagut pitsaasunik aqqusineeraliornikkut Nuummilu pisortat kikkunnut tamanut ingerlassissutaasa ajornannginnerusumik atorneqarsinnaasunngortinneqarnerisigut, kommuni pilersaarusiornermi periusissamini 2023-meersumi allappoq.
Justus Hansen (D) kommunip iIlloqarfimmik ineriartortitsinermut sanaartornermullu ataatsimiititaani siulittaasuuvoq. Taanna bussinik angallassinerup pilersaarutitaami taaneqatsiaannarnera siunissamilu qanoq isikkoqarsinnaanera pillugit maanna isummerpoq.
Silap pissusiata allanngoriartornerata kinguneri nunatsinni malugineqarsinnaallutillu ersipput. Biilinik angallattut ikinnerulersinniarlugit amerlanerusut bussertalernissaannut qanoq iliuuseqalersaarpisi?
- Kommunip akiligaanik tamat akeqanngitsumik bussersinnaalernissaat kommunalbestyrelsimi sulissutigaarput. Bussilli aamma anngutikulanerusalernissaat amerlinissaallu, Justus Hansen oqarpoq.
Busserneq ilorrisimaarnarnerusoq akeqanngitsorlu
Nuummi busserneq utoqqarnut 16-iliisimanngitsunullu akeqarunnaarmalli bussertartut amerlipput. Tamanna kommunimut ukiumut 6 millionit koruuninik akeqarpoq.
Bussernerulli allanut akeqarnera akissarissaanerusut bussertannginnerannut pissutaagunarnani bussernerulli ilorrisimaarnarnerusinnaanerali pissutaagunartoq, misissueqqissaarnermi paasinarsivoq.
Busserneq qanoq ilorrisimaarnarnerulersinneqarsinnaanersoq eqqarsaatiginikuuisiuk?
- Naagga, tamannarpiaq eqqarsaatiginikuunngilarput. Bussilli amerlinerisigut ingerlaakulaarnerunissaat immaqalu unnuakkut ingerlaartalernissaat siunnersuutigilersaarparput. Bussimmi annguteriaannaalersinnaanngornissamut minutsit qulikkuutaartalerunik busserneq ilorrisimaarnarnerulertussaassaaq.
- Bussinulli utaqqinerup orniginarnerulernissaannut bussinut aqquserngit naapiffiini utaqqisarfilersuinikkut taakkua amerlinissaat aamma isumaliutigaarput.
Isumassarsiat siunnersuutillu erseqqissut
Qanoq iliuuseqarnissamut kissaaterpassuugaluartut suli erseqqissunik siunnersuuteqartoqanngilaq.
Erseqqissumik qaqugu siunnersuuteqartoqarnissaa innuttaasut naatsorsuutigisinnaavaat?
- Tassa aqqusinermi qulliit angallannermi najoqqutassartaassat bussertartut amerlanerulernissaannut iluaqutaaqqullugit bussinik apuuttoqaliivinneranik ersitsisartulersorneqarnissaat oqaluuseraarput.
- Angallanneq taamaalilluni isumannaannerulerniartussaassaaq.
Suliniutilli taakkua piviusunngortinnissaat akisussasoq, Justus Hansenip aamma oqaatigaa.
- Eqalugalinnguani aqqusinermi qulliit angallannermi najoqqutassartaassalersuineq 7 millionit koruuninik akeqassangatipparput. Aningaasarpussuupput, aningaasammi tamatumunnga atugassat amerlanngereermata. Siunnersuutilli piviusunngortinneqassanersut missingersuutit pillugit tulliani isumaqatiginninniarnitsinni oqaluuserisassatsinnut immaqa ilanngussinnaavarput.
Nuummi bussinik angallassinermi pitsanngorsaanissamik siunnersuuterpassuit piviusunngorumaarnersut piffissap takutikkumaarpaa.