Ataatsimiititaliat paasisassarsiortut
Inatsisartuni ilaasortat paasisassarsiorlutik angalanerminni, Qaasuitsup Kommuniani isumagisassaminnut tunngasunik takuniaassapput.
Ilaqutariinnermut ataatsimiititaliamit angalaqataasussat, tassaasut Jane Petersen IA, aamma Siumumit Aleqa Hammond aamma Ruth Heilmann, kommunip ilaqutariinnut suliniutaannik paasisassarsiussapput, tassa paasisassarsiorfigineqassallutik meeqqanut inuusuttunullu suliniutit, utoqqalinersiutillit atugaat aamma innaarluutilinnik sullissineq.
Nunami namminermi pissutsit pillugit ataatsimiititaliaq, kommuninik nunaqarfinnillu suliassaqarfeqartoq, kommunimi allaffeqarfitsigut ingerlatsinermik paasisassarsiussapput. Ataatsimiititaliamit angalaqataassallutik Kristian Jeremiassen Siumumeersoq aamma Storm Ludvigsen IA-meersoq.
Angalanerminni ilaatigut tikitassaraat Ilulissat, Qeqertarsuaq, Uummannaq aamma kommunip nunaqarfii arfineq marluk. Angalaneq naggaserlugu Uummannami atuarfimmi innuttaasunik ataatsimiititsisoqassaaq, sisamanngornermi aggustip aqqarnanni unnukkut nalunaaqutaq arfineq marlunut.