Hans inatsisitigut ataataqanngitsuuvoq: Ataatani DNA-mik misissuineq aqqutigalugu nassaarigaa
Sisimiuneersumut, Hans Geislerimut 2023 immikkorluinnaq misigisaqarfiuvoq.
Taassuma inuunermi ilarujussua tassa ukiut 65-it inatsisitigut ataatanngitsuuffigereerlugu ilaquttani ilisimanngilluinnarsimasani atassuteqarfigilerpai.
Hans Geisler DNA-mik misissugassamik internettimut nassitsiffiusartumut, MyHeritagemut nassiussivoq, nittartakkami tassani kinguaariinnik misissuisoqarsinnaavoq, suiaasanik nalunaarsuisoqarsinnaavoq oqaluttuarisaanermilu nalunaarsukkanik ujaasisoqarsinnaalluni.
Hansip nittartagaq aqqutigalugu arnaq qallunaaq nassaaraa, taannalu illoorarigaa paasinarsivoq, allaffigaalu.
- Taava akivaanga; akkaaminut ilalisangaaramagooq DNA-artariaqanngitsunga, tassa nuannequtaa! Allaqatigiittarluta paasivara ataataga suli peqqittoq, 84-inik ukioqarpoq maannamut, Hans Geisler oqarpoq.
Tamannalu pissanngassutiginerulerpaa. Hans Geislerimi nulianilu novembarip naanerani Danmarkiliarnissaminut pilersaaruteqarpoq.
Taassuma illoorartaani peqatigalugu ataatanilu ullumikkut Sverigemi najugaqartoq Københavnimi naapinnissartik isumaqatigiissutigaat.
- Decemberip aappaani arfininngornermi naapippugut, pikkunarpoq, nuanneq! Angusisarpallaangajappungaluunniit illarnaannartumik, pisuttaasianut allaat, qanoq ilioriaasianut allaat imminut takuvunga, aamma ataataga soorlu taamatut misigerpasittoq.
Amerlasuunut nuannaarnermik pilersitsoq
Hans Geislerip ataataminik naapitsinera Hans Geislerimut kisimi nuannaarnermik pilersitsinngilaq. Inatsisitigummi ataataqanngitsup ataataminik nassaarnera amerlasuut misigissusaannut sunniuteqarpoq.
- Inuit nalusarpassuakka, imatut ilisarisimavinngisakka, allaat pilluaqqusisarput … assut nuannersumik tamakku tigusigamik uangaalluni assut nuannerpoq, taanna oqarpoq.
Hans Geislerimullu suli nuannerneruliinnartoqarpoq, taassumami nulia DNA-mik misissuigassamik aamma nassitsinermi kingorna ataataminik aamma nassaarpoq. Ilaqutariit taamaalillutik illuttut nutaanik ilaqutartaarfiusoq, taanna oqarpoq.
- Nuliara ataatsimik qatanngutitaarpoq, uangalu marlunnik qatanngutitaarlunga.
Ukioq 2023 taamaalilluni Hans Geislerimut ilaqutaanullu puigunaatsorsiffiuvoq.
- Assoroorutaasimasut tamakku qanga, soqutaajunnaaramik suna taamaavimmi oqittuaaraaqqamik ….. juullernerput nuannernitaavoq, oqaluttuariuminaapporluunniit.
- Ukioq naalluarisiuk, ukiumilu 2024-mi iluanaarnarnerpaamik kissaappassi tamassi!
