Assigiimmik akiliisarneq atulinngikkallassaaq
Immap naqqatigut kaabilimik qarasaasiatigut aqquteqalernermi aningaasartuutit pillugit Tele Greenlandip pisortaa, Brian Buus Pedersen apersorneqarsimavoq.
Atuagassiami Computerworldimut Brian Buus Pedersen oqarpoq qanorluunniit atuitigigaluaraanni assigiimmik akiliisarneq, Flatratemik taaneqartartoq Nunatsinni atuisartunit atulerusunneqaraluartoq.
Brian Buus Pedersenili oqarpoq aatsaat ingerlatsinermut aningaasartuutikikkaanni taamaaliortoqarsinnaasoq.
- Immap naqqatigut kaabili Nuummiit Nuummullu aqqutigineqarsinnaaleraluartoq, suli sinerissap sinneranut taamatut attaveqarneq siaruartinniartussaavarput, Buus Pedersen oqarpoq.
Attaveqarnerup pitsanngornera sukkatsinneralu sineriammi illoqarfinnut nunaqarfinnullu 60-inut siaruartitertussaavarput, taamaaliornerlu akisoorujussuuvoq. Illoqarfiit annerit akornanni attaveqarnerup pitsanngorsorneranut 120 miliuuni koruuninik aningaasartuuteqarpugut, sulili nunaqarfinnut attaveqarneq pitsanngorsassallutigu, taamaaliornerlu nunaqarfinni inoqatigiinnut tamanut immikkut 50.000 koruuninik akeqarpoq, taamaammat aningaasatigut iluanaarutigiuminaatsorujussuuvoq. Assersuutigineqarsinnaavoq; ullaakkut aqqusinermi angallattoqartaraluaqisoq aqqusinersuarmik sanagaluaraanni imminut akilersinnaanavianngilaq. Taamatut assersuusiorneq inuit paasisinnaalluarpaat, attaveqaqatigiinniarnermulli miliardi koruunit sinnerlugit aningaasaliisariaqarsimanitta inuit 56.000-iinnaalluta matussusiiniartariaqaratta akikillisaagallarsinnaanngitsugut paasiuminaatsinneqartarpoq, Buus Pedersen oqarpoq.
Tele Greenlandilli pisortaa oqarpoq qarasaasiakkut attaveqarnerup qanoq atorneqartiginera malinnaavigilluarlugu, akikillisaanissarlu tunngavissaqalerniariarpat akikillisaariaannaalutik.
