Assartuussineq pillugu isumalioqatigiissitap innersuussutai naalaassavagut
Atorfik nutaaq, suliassaqarfiit nutaat naalakkersuisutullu sulilerneq, tassaapput Steen Lyngep qinersinermi angusarissaalluarnermi kingorna, Atassummilu qinigaanerpaajunermi kingorna aallutariligassai. Peqqissutsimut attaveqarnermullu naalakkersuisuuneq politikerimut misilittagartuumut allaat unamminartupilussuusinnaavoq, Steen Lyngelli atorfik ajukkuffinagu aallartiffigissamaarpaa.
-Suleruluttuaannarnikuuvunga, taamaammat atorfiup taannartaa uannut nutaajunngilaq, kisianni aamma aallaqqaammut paasissutissat nutaarpassuit iserfiginiarnissaat isumageqqaartariaqarsimavara. Ulapinnarlunilu pissanganarpoq, sulinerullu pimoorussamik aallartinnissaanut qilanaarpunnga, maannami akisussaaffeqarfigilikkakka iserfigilluarsimalerpakka. Akisussaaffeqarfiimmi marluusuni aalajangiinerit pingaarutillit arlaqartut ornippagut, Steen Lynge knr.gl-imut oqarpoq.
Aalajangigassat annertuut arlaqartut ilagaat Kujataani mittarfimmut tunngasoq. Nutaamik mittarfiliortoqassava, mittarfiliortoqassappallu qanoq angitigissava? Apeqqutissat amerlapput, tamakkununngali akissutit ilarpassui assartuussineq pillugu isumalioqatigiissitap nalunaarusiaani innersuussutaasuni nassaarineqarsinnaapput.
-Kujataani annertuupilussuarmik aningaasaliisussaavugut, taamaammat aalajangiinnginnitsinni nalilersugassatigut minitaqannginnissarput sianigeqqissaartariaqarparput. Kujataani silaannakkut angallannerup pitsanngorsartariaqarnera qularnanngilaq, aningaasaliissutissavulli sumi pissarsiaqarfiginerpaassagigut apeqqutaaginnarpoq, Steen Lynge oqarpoq.
Aammattaaq nunatsiinni umiarsualiveqarfiit annertuumik misissuiffigineqartussaapput. Nunatsinni umiarsualiveqarfiit qanoq inissisimanersut misissorneqassaaq, pitsaanerusumillu aaqqiissuussisinnaagutta tamanna aamma misissorneqassalluni.
-Tamakkuninnga suliaqassatilluta nunamut tamarmut suliffissanik qulakkeeriniarluta aningaasaliissutivut nunamut tamarmut siammartissavagut. Nuummi umiarsualivik annertuumik allanngortiteriffiussaaq, tamatumanilu aamma aallaqqaataaniilli suliassat peqqissaartumik ingerlanneqartariaqarput, sinnerilu kingusinnerusukkut suliarineqarlutik, attaveqarnermut naalakkersuisoq Steen Lynge oqarpoq.
