Presidents Cup: Assammik arsartartut Islandimut ajorsartut
![](/sites/default/files/styles/image_934x467/public/2023-12/20231207-202354-L-1920x1279we.jpg?h=c64711ad&itok=auIVQys5)
Assammik arsarnermi nunanut allanut unammisartut VM-imi ajorsartut ingerlaqqiffianni Presidents Cupimi Islandimut ippassaq unammimmata ajorsarput.
Holdit tamarmik maanna inissinniuttussaapput. Taamaammat kalaallit assammik arsartartut Frederikshavnimi pisussatut aaqqissuunneqartumi, Presidents Cupimik taaneqartartumi 25-mit 32-nngorniuunnermi peqataassapput.
Naallu kalaallit arsartartui aallartilluaraluartut, minutsillu qulit siulliit ingerlaneranni siuaraluartut kalaallit unammisartui 14-37-mik ajorsarput.
Kalaallit siuttuat Ivaana Holm unamminermi unammilluarnersaatut toqqarneqarpoq.
Kalaalerpassuit Danmarkimi Frederikshavnimi Presidents Cupimi malinnaapput, arsartartullu unamminerup aallartinnginnerani unamminerullu nalaani tapersersorteqarluarlutik.
Holdit VM-imi peqataasut inissinniunneranni unamminerit nangillugit kalaallit arsartartui Kinamut aqagu unammissapput, Paraguayimullu ataasinngorpat unammissallutik.
KNR-ip timersortuni oqaluttuusartuata Noah Mølgaardip oqarnera naapertorlugu nunatsinnit nunanut allanut unammisartuisa Kinamut Paraguayimullu unamminermi VM-imi ajugaanissaannut periarfissaqarnerusoq, taanna naliliivoq.
Unamminerit marluk taakku KNR TV-kkut isiginnaarneqarsinnaassapput.