Assagiarsuit mianersuullugit
Sisimiut eqqaanni sinerissap qanittuani assagiarsuit ikiliartorput. Tamanna ilisimatuut misissuinerisa aalisartullu pisanut nalunaarsuiviini erserpoq.
Taamaammat Pinngortitaleriffimmi biologit inassutigaat Sisimiut eqqaanni assagiarsuttassat 300 tons-inut ikilineqassasut.
Pisassat katillugit 300 tons-inngussappata ilisimatuut inassutigaat kangerlunni Sisimiut kujataani pisassat 150 tonsiussasut taamatullu Sisimiut avannaanni Nassuttuumi Isortumilu pisassat 150 tonsiussasut.
Taama pisassiinissaq Naalakkersuisut malissappassuk 2011-mi pisassanut sanilliullugu 200 tons-inik ikileriartoqassaaq. 2011-mi Sisimiut eqqaanni assagiarsuttassat katillutik 500 tonsiupput nunalu tamakkerlugu pisassat 2.430 tons-iullutik.
Biologit aamma inassutigaat Sisimiut avataanni Holsteinsborg Dyb-imik taaneqartartumi assagiarsunniaqqusiunnaarneq ingerlaannassasoq tamaani assagiarsuit suli ikiliartortut paasineqarsimammat.
2012-mi pisassat Naalakkersuisut kingusinnerusukkut aalajangiiffigissavaat.