ASK iluarsaanneqarnissamut utaqqikatappoq
Atuarfik Samuel Kleinschmidtip iluarsaanneqarnissaa Kommuneqarfik Sermersuup kissaataasa pingaarnerit ilagaat aappaagu sanaartugassat eqqarsaatigalugit.
Kommuneqarfik Sermersuup kommunalbestyrelsiata marlunngormat ataatsimiikkami akuersissutigaa kommuni Sanaartornermut, Attaveqatigiinnermut Angallannermullu Naalakkersuisoqarfimmut ASK-ip iluarsaanneqarnissaanut kissaateqassasoq.
Kommune kissaamminik marsip aallaqqaataatinnagu nassiussereersimasussaavoq, kissaatigineqartut Namminersorlutik Oqartussat aningaasanut appaagumut inatsisissami siunnersuutigineqartut ilanngullugit suliarisinnaaniassammatigit.
Aningaasanut ukioq mannamut inatsimmi allassimasoqarpoq Namminersorlutik Oqartussat 69,1 million koruunit ukiuni tulliuttuni, 2013, 2014, 2015 aamma 2016, missingersuutini agguarlugit aningaasaliissutaassasut. Aappagu 15 million koruunit aningaasaliissutaassallutik 13 million koruunillu 2016-mi aningaasaliissutaasut, sinneri 20-it aamma 21 million koruunit ukiuni akunnermiliuttuni aningaasaliissutaassallutik.
Hans Peter Broberg, Kommuneqarfik Sermersuumi atuarfeqarnermut immikkoortortaqarfimmi pisortaq, neriuppoq ASK-ip iluarsaanneqarnissaannut Inatsisartut maannakkut aalajangivikkumaartut.
- Atuarfimmi sanasut kaattarpalunnerat aatsaat tusaalerukku upperilissavara atuarfik iluarsaallugu aallartinneqartoq, Hans Peter Broberg oqarpoq, erseqqissaallunilu Inatsisartut atuarfiup iluarsaanneqarnissaanut aningaasaliissaallutik ukiuni ikinnerpaamik 10-ni oqaluuserisaqartaraluartut, pivisunngortinneqarsimanngisaannartumik.
