Asiip Kielsen akivaa
Kim Kielsenip isornartorsiuinera Sermitsiaq.AG-mi allaaserineqarpoq, Kommuneqarfik Sermersuullu borgmesteria Asii Chemnitz Narup isornartorsiuinermut maanna akissuteqarpoq:
- Siorarsiorfimmi suliniutip isumaannakkut pilersaarutaaneragaaneq akuerinngilluinnarpara. Ilisimalluinnarparali naalakkersuinikkut piumassuseqarnermik pisariaqartitsisoqassasoq. Pissusiviatigulli nunamut siulersuinermut ineriartortitsinermullu qaffasinnerpaamik inuup akisussaaffeqartup ilapittuuteqarniannginnera iluaqutaanngilaq.
AAMMA ATUARUK Kielsenip Asii parteeqatinilu isornartorsiorai
Taamaattorli ukiuni kingullerni Siumumit aqunneqarnerup nalaani ilisimalikkat tassaapput Kommuneqarfik Sermersooq inerniliissutissanik nammineq pilersitsisariaqartoq, Naalakkersuisuniimmi tapersersuisoqanngilaq, Asii Chemnitz Narup, Facebookikkut quppernermini taama ilaatigut allaaserisaqarpoq.
Naalakkersuisut siulittaasuata Siorarsiorfimmi sanaartornissamut suliniutimik isornartorsiuinermini ilaatigut oqaatigaa pilersaarut aningaasalersorneqanngitsoq isumaannakkullu pilersaarutaasoq.
