Asii kommunimut qinersinermi taaguunneqarnerpaalluni rekordiliisoq
Partiimi taaguunneqarnerpaasoq tassaavoq Asii Chemnitz Narup, taanna 2259-init taaguunneqarluni kommunimut qinersisarnerni taaguunneqarnerpaatut rekordiliivoq.
Partiip siuariaateqarnera marlunnik borgmesterinngortitsinermik aamma kinguneqartussatut isikkoqarpoq. Asii Chemnitz Narupip Demokraatinik suleqateqarnermigut Kommuneqarfik Sermersuumi borgmesteriunini isumannaarpaa, Ane Hansenilu Qaasuitsup Kommuniani kommunitaassami kujallermi tapersersortissaminik qulakkeerissinnaassanerluni paaseqqaartariaqassavaa.
Aasiaat Kommunerisimasaani borgmesteriusimasoq 350-init taaguunneqarluni kommunimi angusagissaanerpaavoq. Partiialu Inuit Ataqatigiit qinersinermi aamma ajugaavoq 44,5 procentinik taaguunneqarluni, tulliuvorlu Siumut 40,6 procentinit taaguunneqartoq.
Ilaasortaatitassat agguataarneqarnerat taamaalilluni aalajangiisuusussanngorpoq, Ane Hansenili borgmesterinngussaguni Atassummit Demokraatiniilluunniit tapersersorneqartariaqassaaq.
Qaasuitsoq Avannarlermi Inuit Ataqatigiit 16 procentinit taaguunneqarput, Qeqqata Kommunianilu procentpointinik sisamanik siuariaateqalaarlutik. Taamatullu siuariaateqarnerat Demokraatit Kommune Kujallermi tamatumuuna qinigassanngortitsinnginnerannik pissuteqarsinnaavoq.
