Aqutsisoqarfik GML-ilu nalunaarusiat pillugit aaqqiagiinngillat
Aatsitassanik Suliassaqarfinnut Avatangiisinut Aqutsisoqarfik (ASAA) Australiamilu aatsitassarsioqatigiiffik Greenland Minerals Ltd. (GML) Kuannersuarni aatsitassarsiorfissap avatangiisinut sunniutigisinnaasaasa nalilerniarneranni malartaaserput.
ASAA isumaqarpoq, GML-ip Kuannersuarni ilaatigut qinngornerit sunniisinnaanerat akoorutissanillu Narsami kuummut Sermilimmilu nunamut kuuaartoqarsinnaaneranik naliliisitsinerminut tunngatillugu avatangiisinut sunniutinik naliliinermut maannamut nalunaarusiarisimasai paasissutissanik eqqunngilluinnartunik, kukkuneqarluinnartunik amigarluinnartunillu imaqartoq.
Paarlattuanik GML-ip aqutsisoqarfik GML-imut aatsitassarsioqatigiiffinnut allanut sanilliullugu avatangiisinut sunniutinik naliliinermut tunngasutigut piumasaqaateqarsimavallaarnerarlugu assigiinngisitsimanerarpaa, tamatumalu saniatigut aqutsisoqarfimmut siunnersortit avataaneersut piginnaasai apeqquserlugit.
Aqutsisoqarfiup GML-illu e-mailikkut attaveqatigiinnikkut allagaat KNR-ip pissarsiarisai taama ersersitsipput.
Avatangiisinut tunngasutigut ukiorpassuarni aaqqiagiinngillat
Aatsitassarsioqatigiiffiup GML-ip ASAA-llu aaqqiagiinngissuteqalinnginneranni aatsitassarsiorfimmik nunatsinni aatsitassarsiorfiusuni annerpaajusussamik Narsami pilersitsisoqarnissaa pillugu avatangiisinut sunniutinik naliliinernut tunngasutigut attaveqatigiinnerit ukiorpassuarni ingerlanneqarput.
GML avatangiisinut sunniutinik naliliinermut nalunaarusiamik 2015-imi decembarip qaammataani siullerpaamik saqqummiivoq. Nalunaarusiap saqqummiussaata ASAA-mit naliliiffigineqarnera ukioq ataasingajammik sivisussuseqarpoq, ASAA-llu nalunaarusiami kukkunerit angisuut anginngitsullu nassaarisai 300-ngajaapput, tamatumalu kingorna tamanut ammasumik nalunaaruteqarnermigut GML nutaamik nalunaarusioqquaa.
AAMMA ATUARUK Greenland Minerals saffiugassanik piiaanissamut akuerineqarnissamik qinnuteqarput
Avatangiisinut sunniutinik naliliinermut nalunaarusiaq nutaaq GML-imit 2018-imi aggustip qaammataani saqqummiunneqarpoq, tamatumalu kingorna GML ASAA-mik ataatsimeeqateqaqattaareerluni nalunaarusiamik nutartikkamik oktobarimi saqqummiivoq. ASAA-li naapertorlugu nalunaarusiaq taanna annertuunik suli kukkuneqarlunilu amigaateqarmat ASAA-mit aamma itigartinneqarpoq.
GML Naalakkersuisunut naammagittaalliuteqarpoq
ASAA-p nalunaarusiamut nutartikkamut itigartitsissuteqarnera GML-imullu tunngatillugu suliamik ingerlatseriaasia GML-ip ima erloqissutigitigaa, naammagittaalliutinik arlalinnik naalakkersuisoqarfinnut arlalinnut ukioq manna februaami nassiussillunilu ASAA pillugu naammagittaalliummik tamanut ammasumik ukioq manna apriilimi saqqummiivoq.
ASAA tassani ilaatigut nakerisarsiorsimanerarneqarlunilu aatsitassarsioqatigiiffinnut allanut assingusunik piumasaqaateqarsimanngitsuunerarneqarluni GML-imit naammagittaalliutigineqarpoq. GML-ip ASAA piumasaqaatinut tunngatillugu ingasattajaarpallaarnerarlugu isornartorsiorpaa – tamatumani ilaatigut pujoralaap qinngualanerillu siunniutaat pillugit paasissutissanik katersinermut - GML-imit 1,6 millioner koruuninik maannamut aningaasartuutaasimasumut - tunngasutigut.
AAMMA ATUARUK Suliniutip inuiaqatigiinnut tunngasunut kingunerisai pillugit nalunaarusiaq akuerineqarnissaminut piareerpoq
Naggataatigullu GML-ip ASAA-mut siunnersortit aatsitassarsiorfissaq pillugu suliatigut illuinnaasiortumik naliliisimanerarlugillu aatsitassarsiorfissamik angivallaarneraanermikkut taassumalu avatangiisinut sunniisinnaanerata aarlerinartoqarsinnaaneraanermikkut nakerisarsiorsimanerarnerisigut isornartorsiorpai.
- Tamanna aqutsinerlunnerujussuartut, piaaraluni akornusersuinertut imaluunniit suliatigut pisussaaffinnik naammassinnilluarnissamut tunngatillugu piginnaanikinnerunertut isigineqartariaqarpoq, GML naammagittaalliummini taama allappoq.
Naammagittaalliummut akerliupput
Naalakkersuisut GLM-ip naammagittaalliutaanut tallimanngormat septembarip arferngani akerliliipput.
- Naalakkersuisut GML-ip naammagittaalliutaa 2019-imi apriilip sisamaaneersoq tunngavissaqannginnerarlugulu GML paasissutissanik ASAA pillugu isornartorsiuinerminut uppernarsaatitut atorsinnaasaanik saqqummiisimannginnerarpaat.
Naalakkersuisulli isumaqarput, GML-ip piumasaqaatinik saqqummiussanik naapertuisimannginnerata akuerineqarnissaminut suliap ukiorpaalunni ingerlanneqarnersimaneranut nammineq akisussaaqataalluinnartariaqartoq.
AAMMA ATUARUK Kuannersuit pillugit nalunaarusiaq utaqqisaasoq pisortanut tunniunneqartoq
Naalakkersuisut aamma nakerisarsiortoqarsimannginneraapput. Naalakkersuisut allapput, aatsitassarsiorfissaq aatsitassanik radioaktiviusunik qinngornilinnik – uranimik thoriumimillu – nunatsinni kisiartaalluni piiaaviusussaassammat immikkut ittuusoq – tamannalu aatsitassanik radioaktiviusunik qinngornilinnik uninngasuuteqarnermut suliarinninnermullu arlalinnik piumasaqaateqarnermik malitseqartoq.
Ilisimatusarnikkut siunnersuisartut arlaannaannulluunniit attuumassuteqanngitsut Nationalt Center for Miljø og Energimeersut (DCE) Pinngortitaleriffimmeersullu ASAA-mut siunnersortaanerupput. Taamatuttaaq GEUS-imeersut Canadamilu uranisiornermi isumannaallisaanermut isumalioqatigiissitaneersut (CNSC) pujoralaap sunniutaanut tunngasutigut aammalu Robertson GeoConsultantimeersut, tassa Canadami siunnersuisartoqatigiiffimmeersut, ASAA-mut silaannarmik mingutsitsinermut igitassanullu tunngasutigut aamma siunnersortaasarsimapput.
Naalakkersuisut aamma isumaqarput, GML siunnersortit piginnaasaannik tunngavissaqanngitsumik isornartorsiuisimasoq.
- Naalakkersuisuttaaq GML-ip siunnersortit naliliinerisa tutsuiginassuusannik apeqqusiisimanera naleqqutinnginnerarlugulu tunngavissaqartinnginnerarpaat.
Allatut oqaatigalugu, Naalakkersuisut GLM-ip naammagittaalliutai tamaasa akerleraat, GML-ilu ASAA-p piumasaqaataanik naammassinninnissaminut naalakkersuisunit inanneqarpoq. Naalakkersuisullu oqartussaanerpaammata GML-ip naammagittaalliutini oqartussaasunut allanut suliareqqitassanngortissinnaanngilaa.
GML ASAA-lu aaqqiagiinngissuteqaraluartut GML taamaatiinnarumanngilaq. GML avatangiisinut sunniutinik naliliinermut nalunaarusiamik nutaamik ASAA-mit maanna naliliiffigineqaleruttortumik juunimi saqqummiivoq.
