Kuannersuit Greenland Minerals saffiugassanik piiaanissamut akuerineqarnissamik qinnuteqarput
Greenland Mineralsip nittartagaani atuarneqarsinnaavoq Kuannersuarni piaanissamik qinnuteqaatini pisortatigoortumik Naalakkersuisunut massakkut tunniukkaa.
Aatsitassanut Suliffeqarnermullu Naalakkersuisoqarfimmi pisortaq Jørgen Hammeken-Holm qinnuteqaammik tigusaqarsimallutik KNR-imut ilumoorneraavoq, erseqqissarluguli akuersissuteqarnissaq suli utaqqisariaqassasoq:
- Qinnuteqaat suli naammassineqarsimanngilaq, tassa ASN-imik nalunaarusiap inatsisitigut imamigut ilutsimigullu qanoq ittuunissaanik piumasaqaatit suli naammassineqarsimanngimmata, oqarpoq.
AAMMA ATUARUK Kuannersuit pillugit nalunaarusiaq utaqqisaasoq pisortanut tunniunneqartoq
Kuannersuarni aatsitassarsiornissamik suliniutip avatangiisinut sunniutigisinnaasai ASN-imik nalunaarusiami nassuiarneqarput, aatsitasssarsiornermi pingaarnertut saffiugassanik qaqutigoortunik piiaanissaq sinnikuinilu uranimik piiaanissaq kissatigineqarput.
ASN-imut missingiutit sisamaat tunniunneqarpoq
Aatsitassanut tunngasunut Aqutsisoqarfiup qinnuteqaat nalilissavaa. Aqutsisoqarfik nalunaarpoq ASN-imik nassuiaatinut missingiutit tunniunneqareersimasut amigaatigisaat pingaarnerit qulequttatut isikkulerlugit makkuusut:
- Saffiugassiat pingaarutillit piiarnerini ujaqqat sinneruttut piiarnerini suliarinerinilu akugisaanik atortussianik ajoqutaasunik misissuinerup inaarutaa
- Piiakkani aatsitassat radioaktiviusut qinngornerisa sunniutaannik qinngornernik ilisimatuussutsikkut naliliinerit misissuinermillu inaarutaasut
- Kinnganikut sinneruttut suliarinerini periarfissat allat kinnganikunillu suliarinniffiit matunerisa nassuiarlugit allaaserineqarneri
- Nunap sajussinnaanerata navianaataanik itisilerisumik naliliineq
Aatsitassanut tunngasunut Aqutsisoqarfiup aamma paasissutissiissutigaa ASN-imut missingiutit sisamaat Greenland Mineralsimit 17. Juuni tunniunneqartoq, aammalu ilisimatuussutsikkut siunnersuisartut pituttorsimanngitsut Nationalt Center for Miljø og Energi-meersut (DCE) aamma Pinngortitaleriffimminnaannersut (GE) suleqatigalugit ASN-imik nalunaarusiaq nassiunneqartoq kingulleq misissuleruttorlugu.
Nalunaarusiat tamanut ammasumik tusarniaassutigineqassapput
Inatsisini maleruagassat allassimasut ASN-imik nalunaarusiamut missingiutip malissimanerai Aatsitassanut tunngasunut Aqutsisoqarfiup qaammatit marlussuit ingerlanerini paasisimassallugu naatsorsuutigaa.
ASN-imik nalunaarusiap inatsisitigut piumasaqaataasut aamma inuiaqatigiinnut sunniutaanik nalunaarusiaq naammassigunigit tamanut ammasumik tusarniarneqassaaq. Suliamut tunngasut pillugit innutaasut aperisinnaanissaat tusarneqarnissallu tamatuma kingunerissavaa.
AAMMA ATUARUK Kina saffiugassanik qaqutigoortunik Kuannersuarneersunik pisiortorusuttoq
Aatsaat tusarniaanermut akissutit suliarineqareerpata Naalakkersuisut ASN-imik nalunaarusiaq akuerisinnaavaat, kingornatigullu peqqissuseq, isumannaatsuuneq, avatangiisit, isumalluutinik atuineq aamma inuiaqatigiinnut ajoqutaanngitsumik kinguneqarnissaa eqqarsaatigalugit aatsitassarsiornermik suliniut illersorneqarsinnaasumik ingerlanneqarsinnaanersoq ataatsimut aalajangiifigalugu. Taamaassappat piiaanissamut akuersissut tunniunneqarsinnaavoq, suleqatigiinnissamut isumaqatigiissut (IBA-mik isumaqatigiissut) Naalakkersuisunit, kommuunimit suliffeqarfimmillu suleqatigiissutigisaq ilanngullugu.