Inequ Holmip Sermersuaq ituippaa: Artorsarfiup kingorna inuuneq ingerlaqqippoq

- Sermersuaq ituillugu angalanerput nuannerluinnarpoq, angalanitsinnilu sila peqqarniitsoq aqqusaartarlutigu. Inequ Holm taama oqarpoq.

Inequ Holm ukiut marluk matuma siorna piartuummik napparsimavoq, pilersaarutinilu sinnattunilu piviusunngortillugu arnat allat arfinillit peqatigalugit sermersuaq ituissimalerpaa.

Arnat allat arfinillit peqatigiiffik Expedition Pink Ribbonimeersut ilagalugit sermersuaq ulluni 28-ni silarluk akiorlugu angalareerlutik ituissimalerpaat.

Inuunermi erloqinartumik, atungarlioreernermi inuuneq ingerlaqqippoq

Sermersuaq ituillugu ulluni 28-ni pisunnermi peqataasuni arfineq marluusuni sisamat iviangimikkut kræfteqarsimasuupput, taamannallu iliuuseqarneq iviangikkut kræfteqarnerup eqqumaffigineqarnerunissaanut iliuuseqarneruvoq.

Angalanermi siuttuata Silje Løkengip oqarneratut inuunermi erloqinartumik, atungarlioreernermi inuuneq ingerlaqqittarmat eqqaamasariaqarpoq.

Sermersuaq ituillugu ingerlasut piumassuseqarluarlutik peqatigiipput, Assi © : Inequ Holm

Meriarneq, napparsimaneq, naarlunnerlu

- Sermersuaq ituillugu ilungersornarpoq. Timikkut tarnikkullu ilungersunanngikkaluarpat eqqumiiginassangaluarpoq. Piareersarsimasariaqarpormi. Inequ Holm taama oqarpoq.

Taama qatsitsigisumut pineq ammukarnerlu ilungersunartuusoq oqaluttuaraattaaq, ullormut akunnerni qulini pisuttarput, peqataasullu ilaat napparsimalertarput meriarlutik naarlulerlutillu.

Aamma kiaqalertarput, tamanna timip qanoq ilungersortinneqarsimatingineranik takussutissaavoq. Timili iviangikkut kræfteqarnikuulluni sakkortuumik aqqusaangaqareernikoq soorlulusooq pisut sakkortuut aningorsinnaanerulersikkaat.

Sermersuaq ituillugu angalaneq majip tallimaani Kangerlussuarmi aallartippoq junillu aallaqqaataani naammassineqarluni.

Sermersuaq ituillugu angalaneq norskit qarasaasiakkut aallakaatitserarfiatimit AltiBoxmit piviusulersaarusiarineqarpoq.