Arsaattartut Kattuffiata Rene Olsen nunanut allanut unammisartunut sungiusaasunngorteqqikkaa
Rene Olsen nunanut allanut unammisartunut januaarimi sungiusaasuujunnaartoq maanna sungiusaasunngoqqippoq.
Kalaallit Arsaattartut Kattuffiat, KAK taama nalunaaruteqarpoq, sungiusaasumillu soraarsitsinini kukkunerusoq nassuerutigalugu. Soraarsitsinerummi kingunerani qisuariaateqartoqangaatsiarpoq.
KAK-p siulittaasua, Benjamin Kielsen tusagassiuutinut nalunaarummi allappoq:
AAMMA ATUARUK Sungiusaasumik soraarsitsisoqareernerani futsalertartut: KAK tassani uniorpoq
- Januarip aallartinnerani KAK-miit nalunaarutigaarput futsal landstrænerimik suleqateqarneq unitsillugu. Tamatuma kingorna qisuariarnerit assigiingittut pisimapput KAK-mi siulersuisut aalajangiinikuunertik uterfigalugu nalilersueqqipput isumaqatigiisutigalugulu Rene naaperiaafigineqassasoq uteqqinnissaa siunertaralugu.
Nunanut allanut unammisartunut sungiusaasup uteqqinnini nuannaarutigalugu tusagassiuutinut nalunaarummi aamma oqaatigaa:
- Nunanut allanut unammisartunut sungiusaasunngoqqinnera nuannaarutigaara, nutaamillu nukissaqarlunga arsaattartut kattuffiullu suleqatiginissaanut qilanaarpunga
Soraarsitsisoqarnera arsaattartut kamaatigigaat
Rene Olsen nunanut allanut unammisartunut sungiusaasutut januaarimi atorunnaarsinneqarnera KAK-p angusat amigarnerannik pissuteqarnerarpaa. Tamanna futsalimik nunanut allanut unammisartut Nordic Cupimi peqataaqqammerneranni pivoq.
Nunanut allanut unammisartut siulersortaata KAK-p aalajangernera tamatuma kingorna isornartorsiorpaa.
KAK-p sungiusaasumik soraarsitsinera nunanut allanut unammisartunit isumaqatigineqanngilaq, taakkulu Rene Olsenip sungiusaasutut piginnaasai taarseruminaatsuussasoraat.
AAMMA ATUARUK Nuummi arsaattartut peqatigiiffii nuna tamakkerlugu sungiusaasup soraarsitaanera pillugu: Atorfinitseqqinniarsiuk
- Takujuminaatsippara Nunatsinniittumik Rene Olsenitut piukkunnartigisoqarsinnaanera, Lars-Erik Reimer oqarpoq.
Benjamin Kielsen aamma Rene Olsenip sungiusaasutut piginnaasai apeqqusinngilai taamaattorli nutaamik nuna tamakkerlugu sungiusaasoqalernissaa aalajangiusimallugu.
- Tunngaviusumik isumaqarpugut futsalimik ineriartortitsinerup inummik ataatsimik isumalluuteqarluni ingerlanera ernumanartoqartoq sungiusaasullu pikkorissut arlallit pilersikkusuppagut. Qularinngilara pikkorissumik nuna tamakkerlugu sungiusaasumik nassaarumaartugut, Benjamin Kielsen januaarimi oqarpoq.
Rene Olsenili nunanut allanut unammisartunut maanna sungiusaasuuleqqippoq.
