Nuummi arsaattartut peqatigiiffii nuna tamakkerlugu sungiusaasup soraarsitaanera pillugu: Atorfinitseqqinniarsiuk
Illup iluani arsaannermi futsalimi nuna tamakkerlugu sungiusaasoq Rene Olsen KAK-mit soraarsinneqarput nunat avannarliit unammineranni Nordic Cupimi decemberimi kalaallit ujamminnanngimmata.
Nordic Cupimili ujaminnannissamik piumasaqarneq piffissaanngitsukkut pisoq NBU-miit isumaqarput.
Taannaavoq Nuummi arsaattartut suleqatigiiffiat.
- Ukiut marluk kingulliit arsaattartuutivut atugarliorput. Taamaattumik soraarsitsinissamut piffissaq eqqortuusorinngilarput, NBU-miit Inuaraq Petersen oqarpoq.
- Killilersuutit amerlasuut atuunnikuupput peqatigiiffinni sungiusarniarnermut killiliisut. Taamaattumik tupinnanngilaq arsaattartuvut massakkut killilimmik angusaqarmata. Tassami sungiusanngikkaanni angusaqartoqarsinnaanngilaq, Inuaraq Petersen itisiliivoq.
AAMMA ATUARUK Sungiusaasumik soraarsitsisoqareernerani futsalertartut: KAK tassani uniorpoq
KAK-mi siulittaasup Benjamin Kielsenip ataasinngornermi KNR-mut naqissuserpaa Rene Olsenip soraarsinneqarneranik aalajangerneq allanngortinneqarnavianngitsoq.
Annaasassaqanngilaq
Tamannali apeqqutaatinnagu NBU kajumissaarivoq aalangernerup naliliiffigeqqinnissaanut – aamma Rene Olsenip sungiusaasutut pikkorissusaa KAK-mit apeqquserneqanngimmat.
- KAK-mit nalilersorneqartariaqartut ilagaat suna annaalerneripput qanorlu tamanna naleqarnersoq. Taava isiginiarneqartariaqarpoq suna pissarsiassaanersoq taannalu qanoq akeqassanersoq, Inuaraq Petersen oqarpoq Rene Olsenip soraarsinneqarnera pillugu NBU-mi oqallisereerlutik taamalu kaammattuutigalugu pisup ammasumik oqaluuserineqarnissaa.
- KAK-mit Rene Olsen qanimut ataatsimeeqatigalugu siunissaq eqqartorneqartariaqarpoq, Inuaraq Petersen oqarpoq.
- NBU-miit isumaqarpugut Rene Olsenip soraarsinneqarnera atorunnaarsissinnarlugu atorfinitseqqinneqartariaqartoq. Taamatut iliorutta annaasassaqanngilagut, Inuaraq Petersen naggasiivoq.
AAMMA ATUARUK Futsal: Kalaallit Nordic Cupimi sisamaattut inissipput
NBU-p oqaaseqaataa KNR-ip KAK-mut saqqummiuppaa.
Arsaattartulli kattuffianni siulittaasoq Benjamin Kielsen ilisimatitsivoq suliaq naammassereersutut isigalugu.