Sungiusaasumik soraarsitsisoqareernerani futsalertartut: KAK tassani uniorpoq
Futsalimi unammersuarnermi Nordic Cupimi ujaminnannertaqanngitsumik peqataaneq Rene Olsenip nuna tamakkerlugu sungiusaasutut soraarsitaassutigaa.
Tassami sapaatip akunnera kingulleq KAKp Rene Olsenimik suleqateqarneq unitsippaa.
KAK-mi siulersuisut taama aalajangerput Nordic Cup-mi peqataaneq januarip qeqqani nalilersuiffigineqarmat.
Nunanulli allanut unammisartut ajornartorsiutip qiterisaa allamiissoraat.
- Nordic Cupimi sapinngisarput tamaat ilungersorluta ujaminnanniarnissaq anguniarparput. Isumarpulli malillugu Nunatsinni unammersuariaaseq isumaliutigeqqittariaqarpoq, futsalimi nunanut allanut unammisartut anføreriat Lars-Erik Reimer KNR-mut oqarpoq.
- Puigussanngilarput iligiit unammisagut arsartoqqarmata ukiuunera tamaat ligami unammisaqattaartartunik uagutsinnullu sanilliullugu amerlanerujussuariarlutik unammisarlutik, anføreri itisiliivoq.
Unammersuariaatsip allanngornissaa siunniunneqarpoq
KAK-mi siulittaasup Benjamin Kielsenip Lars-Erik Reimer tunngaviatigut isumaqatigivaa. Taamaattorli erseqqissarpaa Rene Olsenip suleqatigiunnaarneranik aalajangerneq allanngortinneqarnavianngitsoq.
- Qaammatit marluk matuma siorna KAK-mi ataatsimeersuartut Gert Fleischerip siunnersuutaa ilalerlugu unammersuariaatsip allanngortinissaa isumaqatigiissutigaat. Ataatsimeersuarnermit imaqarniliaq tigoqqammerparput unammersuarnermullu ataatsimiititaliap ataatsimeersuarnermiit suliakkiissut tigusussaallugu, Benjamin Kielsen oqarpoq erseqqissarpaalu unammersuariaaq nutaaq aatsaat aappaagu piaarnerpaamik atulersinnaassasoq.
AAMMA ATUARUK Futsal: Kalaallit Nordic Cupimi sisamaattut inissipput
Nunanulli allanut unammisartut KAKp sungiusaasumik soraarsitsinera isumaqatiginngilaat isumaqaramik Rene Olsen sungiusaasutut piginnaasaqartoq allamik taarseruminaatsunik.
- Takujuminaatsippara Nunatsinniittumik Rene Olsenitut piukkunnartigisoqarsinnaanera, Lars-Erik Reimer oqarpoq.
- Nammineq sungiusaasutut ilinniarsimanini tunngavigalugu arsartunut tamanut najoqqutassiornikuuvoq assullu siuariartinnikuulluta. Aamma misigisimavugut kalaallimik sungiusaasoqaraangatta siuariarnerusarluta oqareernittullu Rene Olsenitut piginnaasalimmik peqarnera qularaara, Lars-Erik Reimer oqarpoq.
Benjamin Kielsen aamma Rene Olsenip sungiusaasutut piginnaasai apeqqusinngilai taamaattorli nutaamik nuna tamakkerlugu sungiusaasoqalernissaa aalajangiusimallugu.
- Tunngaviusumik isumaqarpugut futsalimik ineriartortitsinerup inummik ataatsimik isumalluuteqarluni ingerlanera ernumanartoqartoq sungiusaasullu pikkorissut arlallit pilersikkusuppagut. Qularinngilara pikkorissumik nuna tamakkerlugu sungiusaasumik nassaarumaartugut, Benjamin Kielsen naggasiivoq.