Arsaannermi silami pissartanngorniunnissat taamaatinneqartut
Silami arsaannermi pissartanngorniuttut aallartillugit ukiormanna siggartoqassanngilaq.
KAK taama aalajangerpoq ataasinngornermi ullaap tungaa Naalakkersuisut nalunaareersut inuit katersuussinnaannerannut killilersuutit atuunnerat sivitsorneqartoq.
- KAK-mi qanoq iliorutta pitsaanerussanersoq eqqartorparput. Aalajangerpugut silami unammersuarnerit tamarmik taamaatinneqassasut, KAK-mi siunnersorti Kaassannguaq Zeeb KNR-mut oqarpoq.
AAMMA ATUARUK Nuna tamakkerlugu angalassagaanni akiuussuserneqarsimasariaqartoq
Angutit inersimasut pissartanngorniunnissaannut anngunniunnerit nukappiaqqallu U-15-it pissartanngorniunnerat aallartereersut coronap maanna tuniluunnera aallartippoq.
- Neriuutigisimagaluarparput arlaatigut pissartanngorniunnerit ingerlanneqarsinnaassasut. Kisianni malittarisassat atuuttut tunngavigalugit taamaatitsissalluta aalajangerpugut, Kaassannguaq Zeeb oqarpoq.
- Qularinngilara arsaattartorpassuit taamaatitsineq pakatsissutigigaat aammalu piumassusaat annikillisimassasoq, Kaassannguaq Zeeb oqarpoq.
Sulinngiffiit pilersaarusiornerat
Angutit silami 2019-mi augustimili pissartanngorniuteqqinngillat, taamanikkullu Nagdlúnguak Ilulissaneersoq pissartanngorpoq.
AAMMA ATUARUK Nuummi tuniluunneq: Tunillaassuuttoqarneranik ersiuteqarpoq
GM Ilulissani maanna pisussaagaluarpoq soorlu aamma siorna taama pisoqartussaanikuugaluartoq.
Kinguartitsigallarsinnaaneq KAK-mi aamma oqaluuserineqaraluarpoq.
- Siumungaaq inuit feeriassatik pilersaarusiortarpaat. GMip kinguarteqattaarnissaa orniginanngilaq imaassinnaagami iligiit ilaat tamakkersinnaajunnaassasut feeriassaqannginneq pissutigalugu, Kaassannguaq Zeeb oqarpoq.
Nunanut allanut unammisartut Danmarkimut septemberimi sungiusariaqatigiinnissaat KAK-mit suli aalajangiusimaneqarpoq.