Nuummi innuttaasorpassuit covid-19-imut misissortikkiartornissaannik kaammattorneqarput.Assi: KNR / Malik Brøns

Nuummi tuniluunneq: Tunillaassuuttoqarneranik ersiuteqarpoq

Nuummi covid-19-ip aqunneqarsinnaanngitsumik tuniluunneranik pasitsaassisoqarpoq. Nuummi sapaatip akunnerata naanerani inuit arfineq pingasut tunillatsissimasut pasineqarput, taamaalillutillu Nuummi inuit coronavirusimik tunillatsissimasut katillugit qulinngorput.

Erseqqissaaneq: Inuit sumiiffinni assigiinngitsuni ataani taaneqartuni najuussimasut angerlarsimaannaqquneqanngillat, misissortikkiartornissaalli kaammattuutigineqarpoq.

Covid-19-imik tunillatsittut amerleriapiloorput. Tamanna naalakkersuisut nittartagaanni atuarneqarsinnaavoq.

Nuummi Narsamilu sapaatit akunnerata naanerani inuit arfineq pingasut katillugit tunillatsipput, Nuummi arfineq marluk Narsamilu ataaseq.

- Tunillatsittoq ataaseq tuniluunnerni ilisimaneqartuninngaanniinngillaq, tunillatsissimasut pingasut allat suminngaanniit tunillatsissimanersut paasiniarneqaleruttorpoq. Tamanna Nuummi tunillaassuuttoqarneranik takussusiivoq, tusagassiuutinut nalunaarummi allaqqavoq.

Tunillatsissimasut illoqarfimmi angalaarsimapput

Inuit qulit tunillatsissimasut maanna mattusimapput, taakkunanngalu arlallit tunillatsissimanertik suli paasinagu illoqarfimmi sumi tamaani angalaarsimapput.

Taamaammat Juulip qulinganiit juulip 17-ia ilanngullugu piffinni taaneqartuni najuussimasut misissortinnissaat kaammattuutigineqarpoq:

- Brugseni Nathalies, Nuussuaq
- Pisiffik Qinngorput
- FitnessGL, sullorsuup eqqaaniittoq
- Neriniartarfik IGGU
- Imerniartarfik AURUM
- Cafeteriat Igaffik (10/7 aamma 12/7)

Taakku saniatigut juulip ulluisa aqqaneq aappaanni Kangaamiuniissimasut misissortikkiartornissannik aamma kaammattorneqarput, tamaanimi aamma covid-19-ertoq angalaarsimammat.

Ersiutillit tamarmik misissortissapput

- Ersiutillit tamarmik misissortikkiartornissaat kaammattuutigineqarpoq, taavalu angerlarsimaannaqqusaanertik attatiinnassagaat, tunillatsissimanermik uppernarsaammik pinissaasa tungaanut, oqartussat allapput.

Misissortissimasut kingulliip paasineqartuni inuit 28-t katillugit tunillanneqarsimasutut nalunaarsorneqarput. Nuummi qulit, Qaqortumi arfinillit, Sisimiuni tallimat, Narsarsuarmi sisamat, Narsami marluk Ilulissanilu ataaseq.

Nuummi Misissuivik aqagu ataasinngornermi juulip ulluisa 19-ianiit arfininngorneq juulip ulluisa 24-ata tungaanut nalunaaqutaq 12.30-miit – 14.00 tungaanut ammasassaaq. Piffissamik inniminniisoqartariaqanngilaq.
Aamma Kangaamiuni marlunngorpat juulip ulluisa 20-ani misissortittoqarsinnaavoq, ulloq taanna aamma akiuussutissanik kapuuisoqarumaarpoq.

Isummersuutit

Nunatsinni coronavirusi pillugu
killiffik

Tunillatseqqasut 63  
Siullermik kapitissimasut 36.921  
Aappassaa kapitissimasut 26.924  
Misissorneqareersimasut 42.668  
Tunillanneqarsimasut 150  
Peqqisseqqittut 87  
Uninngasut 0  
Anersaartuuteqartitaasut 0  
Toqquteqartut 0  
nun.gl-imi titartaganngorlugit:
Kapitissimasut | Tunillatsissimasut
 
   Nutarterneqarpoq: 
Augustip 5-at 2021 nal. 10:45
 

Coronavirusimik tunillatsinissaq pinaveersaaruk