Assi: KNR / Aviaaja Kielsen

Nuna tamakkerlugu angalassagaanni akiuussuserneqarsimasariaqartoq

Minnerpaamik ataasiarlutit akiuussuserneqarsimaguit aallarsinnaavutit busserlutillu. Naartusut, milutsitisut nakorsartinnermik peqquteqarlutilluunniit kapitissinnaanngitsut maleruagassanut atuutinngillat.

Aaqqissuisoqarfik marlunngorneq 11.30: Immikkoortoq akiuussuserneqarsianissamut tunngasoq erseqqissagaavoq.

- Aatsaat taama tunillatsissimasoqartigaaq. Ilungersunarpoq, tusagassiuortunik katerisitsinermi taama Naalakkersuisut siulittaasuat, Múte B. Egede oqarpoq.

Nuna tamakkerlugu inuit 29-t tunillanneqarsimasut qulillu Nuummiittut oqaatsigaa. Nunatsinni deltameersumik tuniluuttoqarnersoq suli nalunarpoq, Múte B. Egede oqarpoq.

Taamaattumillu killilersuinerit nutaat Naalakkersuisunit atuutilersinneqarput. 

Killilersuutit sapaatit akunnerata siuliani marlunngormat atuutilersinneqartumik aallartissaagut. Tassa inini tamanit iserfigineqarsinnaasuni qanimut assiaquteqarnissaq tallimanngorneq juulip 30-iata tungaanut atuutiinassaaq. 

Katerisimaarnernut killilersuinerit inunnut 20-nut killilerneqarpoq. Aaqqissussinerit 20-t sinnerlugit peqataaasoqartunik aaqqissussisoqaqqusaanngilaq. Katerisimaarnernut killilersuinerit inunnut 20-nut killilerneqarpoq. Aaqqissussinerit 20-t sinnerlugit peqataasoqaqqusaanngilaq. Katerisimaarnerit kaffillernerillu innersuussutigineqanngillat.

Qaqortumiit Sisimiuniillu angalaqqusaannginnerit atorunnaarsinneqarpoq.

Nuna tamakkerlugu akiuussuserneqarsimasariaqartoq

Killilersuutit pioreersut qaavatigut Naalakkersuisut allanik pilersitsipput.

Akiuussuserneqarsimanngikkuit Air Greenlandip timmisartuini ilaasinnaanngilatit. Umiarsuarni sinersortaatini ikeqqusaanngilatit. Bussinittaaq ilaasinnaanngilatit. Taamaattorli taxarsinnaavutit.

Pisortat angallassissutaani akiuussuserneqarnani angalasimagaanni akiliisitaasoqarsinnaavoq.

Tassa akiuussuserneqarsimanngikkaani pisortat angallassissutaani ilaasoqarsinnaanngimmat.

Naartusut, milutsitisut nakorsartinnermik peqquteqarlutilluunniit kapitissinnaanngitsut maleruagassanut atuutinngillat.

Innuttaasut angerlarsimannginertik pissutigalugu kapitissimanngitsut angerlassatillugit kapitissimanissamut piumasaqaat atuutinngilaq. Tassaasinnaapput inuit sulinngiffeqarlutik angalasut. Inuit, nunatsinni angalasimallutik angerlamut angalasut, atikikkunik angerlarsimaannarallassanngillat.

Aappassaanilli akiuussuserneqarsimanani nunatta avataaniit tikikkaanni, ulluni tallimani angerlarsimaannarallarnissaq piumasaqaataavoq. Angerlarsimaanaqqusaaneq atorunnaasappat coronamik misissortinnermi tunillatsissimannginnermik peqartoqassaaq.

Akiussuserneqarsimanissamut piumasaqaat aqagu marlunngorneq juulip 20-aniit atuutilissaaq.

AAMMA ATUARUK Atammimmi tunillatsittoqarsimanngitsoq

Nunatsinni kapitissimanermut uppernarsaat atuutilissaaq. Sulili atuutilinngilaq. Tamanna atuutilerpat akiuussuserneqarsimanngikkuit imerniartarfinnut, neriniartarfinnut timersortarfinnullu iseqqusaanngilatit.

Naammassilluni akiuussuserneqarsimanermut uppernarsaat digitalikkut pappilissatigulluunniit atuutilissanersoq Naalakkersuisut misissuleruttorpaat.

- Qanoq ililluni tamakkiisumik akiuussuerneqarsimanermut uppernarsaasoqarsinnaanersoq misissuleruttorparput, Múte B. Egede oqarpoq.

Killilersuutit unioqqutissimagaanni akiliisitaasoqarsinnaavoq, Naalakkersuisut oqarput.

Ataasiarluni akiuussuserneqarsimagaanni nammineerluni uppernarsaasiortoqarsinnaanngitsoq, Naalakkersuisut oqarput. Kapitissimanermut uppernarsaat Danmarkimi atuuttoq uppernarsaatitut atorneqarsinnaanera periarfissaasoq, Múte B. Egede oqarpoq.  

Misissortinnissaq innersuussutaasoq

Juulip qulinganiit 17-iata tungaanut sumiiffinni ukunaniisimasut coronavirusimik misissortissasut Nunatta nakorsaaneqarfianiit innersuuneqarpoq:

Brugseni Natalie Nuussuaq, Pisiffik Qinngorput, FitnessGL putorsuup eeqqaaniittoq, Restaurant IGGU, imerniartarfik Aurum, Caféteria Igaffik.

Akiuussuserneqarsimanngitsut misissortinnissaat ingammik innersuussutaavoq, Nunatta nakorsaanera Henrik L. Hansen oqarpoq. 

- Allanik tunillaasinnaasut eqqarsaatigaagut. Ersiutillit ukkatarissavagut, tuniluunnerlu unitsinniarlugu taakkuupput nassaarisassagut, taanna oqarpoq. 

- Imminut illersorniaraanni akiuussuserneqartariaqarpoq. Inuiaqatigiinnilu tuniluunneq aamma unitsinniaraanni.

Nuummi coronamut misissuisarfik ataasinngorneq juulip 19-ianiit arfiningorneq juulip 24-iata tungaanut, nalunaaqqutaq 12:30 - 14:00 akornanni tamanut ammassaaq.

Nunatsinni katillutik 29-t tunillanneqarsimapput: Qaqortumi tallimat, Narsami pingasut, Narsarsuarmi sisamat, Nuummi qulit, Sisimiuni arfinillit, Ilulissani ataaseq.

Pingasunngorpat tusagassiortunik katersuisitsisoqaqqissaaq.

Nunatsinni coronavirusi pillugu
killiffik

Tunillatseqqasut ...  
Ullumi tunillatsittut 148  
Siullermik kapitissimasut 73%  
Aappassaa kapitissimasut 68%  
Tunillanneqarsimasut 9.407  
Uninngasut 10  
Anersaartuuteqartitaasut 0  
Toqusut 4  
corona.nun.gl-imi kisitsit takukkit  
   Nutarterneqarpoq: 
Januaarip 21-at 11:41
 

Coronavirusimik tunillatsinissaq pinaveersaaruk