Arsaannermi kalaallit FC Nordsjælland unammissamaalerpaat
Isikkamik arsaattartut Nunarput sinnerlugu unammisartunngorusuttut sungiusarnermi tunaartassamik anguniagassinneqarput.
Tassami nuna tamakkerlugu Morten Rutkjær Superligami unammisartunut FC Nordsjællandimut isumaqatigiissusiorpoq septemberimi taakku arsaaffianni Right To Dream-mi sungiusaammik unammeqatiginissaannut.
AAMMA ATUARUK Toqqaaneq: Aajuku isikkamik arsaannermi nunanut allanut unammisartutut toqqarallakkat
Septemberi aamma sioqqullugu arsaattartut arlaleriarlutik misiligarneqartassapput.
Sammisaqarnissamut Morten Rutkjærip pilersaarusiaa naatsumik oqaatigalugu taamaappoq.
FC Nordsjællandimut unamminissaq qilanaarutaasussanngorpoq.
- Pilersaarut nalaatsornerinnaanngilaq. Neriuutigaara piffissaq sivisuallaanngitsoq qaangiuppat anngunniunnerit ilaanni kalaallit peqataasinnaassasut. Taamaattumik arsaattartut timikkut piareersimalluarniarlutik sungiusarnissamut kajumissuseqarnerulissapput, Morten Rutkjær KNR-mut oqarpoq.
Anngunniunnissat eqqartugai tassaapput nunarsuarmi arsaattartut kattuffiata FIFA ataani unamminissat tassanimi ilaasortanngornissamik Nunarput suliniuteqarmat.
Nunamut 'allamut' unammilaarneq
Morten Rutkjær siorna nuna tamakkerlugu sungiusaasunngorpoq, pisussalli arlallit corona pissutigalugu taamaatiinnarneqarput. Maannali kommunet killeqarfii apeqqutaatinnagit aaqqissuussisoqarsinnaalermat nunap immikkoortuini majimi junimilu sungiusaqatigiittoqarsinnaalerpoq.
- Nunanut allanut unammisartut junimi sungiusaqatigiissapput tassanilu avannaa kujataalu imminnut Nuup arsaattarfiani unammisinneqassapput, Morten Rutkjær oqarpoq.
Taassuma nuannaarutigaa arsaattartut arlallit pimoorullugu sungiusarmata naak corona pissutigalugu siorna GM-rtoqanngereersoq aammalu sungiusaqatigiinnissat kinguartinneqareersut.
AAMMA ATUARUK Nuna tamakkerlugu arsaannermi sungiusaasunngortoq coronap aporfissippaa
- Assut nuannaarutigaara arsartut arlallit eqqarsariaaseq nutaaq atugarput malimmassuk, tassalu sakkortuumik sungiusartarlutik aammalu qaammatikkaartumik killiffitsik misilittarlugu, Morten Rutkjær oqarpoq.
Qeqertarmiut unammiuaarneranni Island Gamesimi Nunarput aasaru tuluit qeqertaanni Guernseymi peqataasussaagaluarpoq unammersuarnissalli taakku aappaagumut kinguartinneqarput.
