Arnat assammik asarlutik finalinnginnerminni: - Unamminissamut piareeqqavugut, angorusunnikooqigatsigu

- Sapinngisarput tamaat sukataassaagut, Kalaallit arnartaasa assammik arsarnermi nunanut allanut unammisartuisa ilaat, Ivalu Berge Puerto Ricomut unnutu VM-imut anngunniunnissartik pillugu taama oqarpoq.
Kalaallit arnartaasa asammik arsarnermi nunanut allanut unammisartui Puerto Ricomut ippassaq unammigamik 23-26-imik ajugaapput. Taakkuluunngu qulinut finaleqatigissavai. Assi © : Richard Immel
Allattoq Marie Kûitse Kristensen, Anders Dall
aggustip 25-at 2021 16:16

Unnugu nalunaaqutaq qulinut unammersuaarneq aallartissaaq. Tassalu amerikap avannaamiuisa Caribiamiullu VM-imut anngunniutivinnissaat aallartikkaluttualerpoq. Kalaallillu arsartui ajugaassaguni ukiaru decembarimi Spaniamut VM-eriartussanngussallutik.

Taamaammallu piginnaasatik tamarmik atorlugit sukataarniarlutik, Ivalu Berge KNR-imut oqaluttuarpoq.

 - Tamaavitta piumaqaagut. Aamma finalimut anngukkatta assut qiimavugut. Unnugu unamminissatsinnut assut qilanaarpugut, taanna oqarpoq nangillunilu:

- Nalunngilarput unnugu unamminissarput allaanerussasoq, kisianni sukataarniarpugut piumassuseqarpugut piareersimalluarluta.

Unamminerit tulleriit pingasut ajugaaffigigai

USA-p illoqarfiani Chicagomi unammiuaarnerni Kalaallit arsartui unamminerni tamani suli ajorsanngillat. Taakku Mexicomut, USA-mut Puerto Ricomullu unamminerminni ajugaapput. Tamannalu unnugu finalimi unamminissamut arsartutut qiimmassaataaqisoq, Ivalu Bergep ilanngullugu oqaatigaa.

AAMMA ATUARUK Kalaallit arnartaasa assammik arsartui VM-imut anngunniutilersut

Naallu Kalaallit Puerto Ricolu ippassaq unamminermi pingasunik siuaqqallutik ajugaaffigigaluarlugit unnugu finaleqatigisussaavai. Taamaakkaluartoq finalimi unammineq allanerungaatsiassasoq, assammik arsartut sungiusaasuat, Johannes Groth oqarpoq.

- Ippassaq unammipput, kisianni taanna tigulaarinniffigineqarsinnaanngilaq finali allaanerungaatsiartussaagami. Taakku unammisarnigut aallaavigalugit ukiuni kingullerni naligiiffiusorujussuusarput taamaattumik nalunarpoq qanoq inerneqassanersoq siulittuuteriissallugu, kisianni arnartatta arsarluarnissaat kissaatiginaqaaq.

Kalaallit Puerto Ricolu finalernerat unnugu qulinut KNR tv-kkut toqqaannaq aallakaatinneqassaaq.

Aamma atuaruk