Arnat amerlanerat isumalluartitsivoq

Inatsisartut siulittaasuata Jonathan Motzfeldt-ip Inuusuttut inatsisartuini ataatsimiinnermik aaqqissuisuusup Inuusuttut Inatsisartuini arnat amerlanerunerat maluginianngitsoorsimanngilaa. Arnat amerlasuut Jonathan Motzfeldtip isumalluarnartoqartippai:

- Aallaqqaataaniilli maluginiarpara arnarpassuusut, tamannalu nuannareqaara. Isumaqarpungalu arnartatta ukiorpassuarni tunuarsimaarsimallutik maannakkut saqqummeriartornerat tamatta nuannaarutigisariaqaripput. Inuiaqatigiit qiviaraanni aamma taamaliartornerat nuannaarutissarujussuuvoq.

Jonathan Motzfeldtip tamanna pillugu arnat siunissami Inatsisartuni amerlanerulernissaat neriuutigilluinnarnerarpaa.

- Sumiluunniit oqallinnerni arnat peqataagaangata, piviusorsiornerusumik naliliinerit isummernerillu arnat peqataanerisigut takkuttarput. Soorlu angutininngaanniit ilaatigut erseqqinnerusumik oqariartuuteqartarmata.

Jonathan Motzfeldtip assersuutigaa ippassaq ataatsimiinnermi ilinniartut akissarsiaat pillugit oqallinnermi arnat piviusorsiornerat maluginiarsimallugu.

- Tassa nalunanngilaq aningaasanik ulluinnarni atorluaanermik misilittagaqartut. Tamanna nalilersuineranni ersermat. Nalilersuinerlu taanna assorsuaq iluatinnarpoq.