Arnaq vikingit umiarsuaata kinngoreernerani ujaarineqartoq toqungasoq nassaarineqartoq
![](/sites/default/files/styles/image_934x467/public/2024-08/20140207-214536-3-1920x1280we.jpg?itok=_gjQd_wv)
Arnaq amerikamiu 20-t sinnerlugit ukiulik vikingit umiarsuaata Norgemi qeqertaasat ilaata Stadip avataani marlunngornermi unnukkut kinngoreernerani maqaasineqartutut nalunaarutigineqartoq toqungasoq nassaarineqarpoq.
Norgemi politiit annaassiniartartuisa pisortaat Morten Rebnord tusagassiorfinnut taama nalunaartoq, Norgemi nutaarsiassaqartitsiviit ilaat NTB pingasunngornermi allappoq.
- Norgep sinerissamik nakkutilliisuisa KV Bergenikkut vikingit umiarsuaat kinngusoq ullaassakkut sumiissusersivaat, arnarlu ujaarineqartoq toqungasoq vikingit umiarsuuaata kinngusup eqqaani ullaakkut arfineq-pingasut qaangeraa nassaarineqarpoq.
- Sinerissamik nakkutilliisut arnaq ujaarisartik nassaarigamikku immamit qaqitsiaannaritsik toqusutut nalunaarutigaat, Rebnord allappoq.
Qanigisaasut kalerrinneqarput.
Vikingit umiarsuaat Savalimmiuniit Ålesundikartilluni Norgemi qeqertaasat ilaata Stadip avataani kinnguvoq. Norgemi annaassiniartartut upalungaarsimasuisa aqutsisoqarfiat HRS Norgemi aviisit ilaannut VG-mut marlunngornermi taama ilisimatitsivoq.
Vikingit umiarsuaannik kinngusoqartoq Norgemi politiinut marlunngornermi unnukkut arfineq-pingasut qaangeraa nalunaarutigineqarsimasoq, NRK allappoq.
Vikingit umiarsuaannik kinngusumi issimasut arfiniliusuni tallimat qulimiguulimmik aaneqarlutik annaanneqartut, politiit kingunitsiannguagut nalunaarput. Annaanneqartut Schweizimeersuusut Savalimmiuneersuusullu, VG allappoq.