Arnannguup uia ukioq ataasingajak maqaasineqarpoq: Eqqissiallannarpoq

- Sumiippamita? Kaannerluni? Anniarnerluni?

Per Lillienskjold Larsenip nuliata Arnanguak Larsenip, uimi siorna juulimili tammaaneqalerneraniilli apeqqutit eqqarsaatigisartagaasa ilai taamaapput.

Taassuma uimi timaa nassaarineqartoq paaseqqammerpaa. Kalaallit Nunaanni Politiit angutip 48-nik ukiullip timaa Nuup qanittuani Kangeersuup eqqaani nassaarineqarsimasoq ullumi paasissutissiissutigaat.

KNR-ip nuliaasoq paasitinneqareernerata kingorna pulaarpaa, taannalu eqqissiallassimalluni oqarpoq.

- Siullertut oqiliallappunga, taanna oqarpoq.

Per Lillienskjold Larsen Nuummiit Maniitsumut umiatsiani qaqortoq atorlugu 2023-mi juulip tallimaani nalunaaqutaq 13:45 aallarpoq. Taassumalu nuliata Arnannguup ulloq taanna puiorsinnaanngivippaa.

- Qilanaarpoq, kiisami ornileraminga. Maniitsuliarusulluni Kangaamiuliarusulluni. Pissamaaruteqarnermik, imaalluni: naa kiisami aggilerpunga. Qilanaarsuaarluni, Arnanguak Larsen oqarpoq.

Nuuk nuannarigaa

Arnanguak Larsenip uini Per Danmarkimi 2019-imi naapippaa, ukiorlu ataaseq qaangiuttoq Nuummi suliffissarsigami nunatsinnut nuupput.

Angutip Nuummi inooriaaseq iserfigisani nuannarilertupallassimagaa oqaatigaa.

- Oqaqqaarnikuuvugut, ukiut marluk pingasut maaniissalluta. Kisianni sivitsoraluttuinnarluni, umiatsiarsigami aamma iniserusulerami, unikkaluttuinnarnikuuvoq, Arnanguak Larsen oqarpoq.

"Siullermik oqiliallappunga"

Per Lillienskjold Larsen Nuummiit Maniitsumut aallarnerminiit apuussimanngimmat aamma tutsiutinngimmat ilaqutaasa politiit attavigaat. Tamatumalu kingorna qulimiguulik politiillu angallataat atorlugit SAR-imik ujaasineq aallartinneqarpoq.

Arnanguak Larsenip apeqquterpassuarnik eqqarsaateqarpoq.

- Ilaa sumiippamita? Qaammatit siulliit uumanerluni? Kaannerluni? Anniarnerluni? Sorpassuit, aqqunaqqanerluni? Ikiortissaqarani inuunini naajartornerpaa imaluunniit?

Taannalu ernumassuteqartuni kisimiinngilaq. Perip angajuata, Lars Lillenskjoldip Danmarkimi najugaqartup nukkami nassaarineqarnissaa kissaatigilluinnarsimavaa. Allaallumi Perimik nassaarinnittumut 10.000 koruuninik akissarsisitsinissi Facebookikkut neriorsuutigalugu. Innuttaasulli angallatillit arlalippassuit qaammatini tulliuttuni angallavisimasaa ujaasiffigiuartarpaat.

- Tunniutiinnarusunnata aamma nalunnginnatsigu uaguusuuppat qanoq ilungersortigissanersoq. Annikilliornaqaaq.

Nuummiit angalasut Perip umiatsiaa Nuummiit akunnermik ataatsimik ungasitsigisumi ullut pingasut matuma siorna nassaaraat.

Nassaarineqarmat qanoq ippit?

- Siullertut oqiliallappunga. Soorunami aamma eqqarsaaterpassuit takkupput, qanoq pisoqarsimava? Susoqarsimava? Kisianni eqqissiallannarpoq. Kiisami ilisaanissaa pilersaarusiorsinnaalerparput.

Perip timaa juunip qiteqqunnerani Danmarkimukaatissigitsik tappavanilu ilisissallutik Arnanguak Larsenip oqaatigaa.

Annerusumik paasisaqarusukkuit Qanorooq unnugu nalunaaqutaq arfineq-marlunut KNR1-ikkut isiginnaarsinnaavat.