Arfiviit nungutaanissamut ulorianartorsiortut amerlanerulersimapput
![](/sites/default/files/styles/image_934x467/public/article_images/groenlandshval._foto_john_jakobsen.jpg?itok=1Z9QKwmZ)
Arfivik nunarsuarmi imartani uumasut miluumasut anginersat tulleraat. Arfivinniartarneq pissutigalugu arfiviit Tunup avannaani nungutaangajapput maannali amerlanerulersimasut paasineqarpoq.
Arfivik nunarsuup avannaarpiarsuata imartaani qaqutigut takuneqartarpoq. Misisuinerit nutaat takutippaat Tunup avannaani arfiviit amerlanerulersimasut.
Inuussutissarsiutigalugu arfanniartarneq ukiut 100-t matuma siornatigut ingerlanneqarmat arfiviit nungutaanissamut ulorianartorsiortinneqalerput.
Arfiviit immami Kalaallit Nunaata russillu qeqertaasa Franz Josef Landip akornanniittut 2004-mi kisinneqarmata arfiviit 50-it missaanniittut takuneqarput.
Arfiviit uumasut nungutaanissamut ulorianartorsiortut allattorsimaffiannut ilanngunneqarnikuupput.
Maannali amerlanerulernissaannut neriuuteqartoqarpoq, ilisimatooq David Boertmann Aarhusip universitetiani issittoq pillugu ilisimatusarfimmi atorfilik taama oqarpoq.
Angallat taassumalu inuttai kiisalu hollandimiut angallataat takornarianik angallasisoq arfivinnik Kalaallit Nunaata Spitsbergenillu akornanni aasarmanna kisitsipput arfiviillu 80-init 100-nut amerlatigisut takusimallugit.
- Nutaarsiassaq ajunngitsuuvoq amerlanerulernerannut patsisaasoq qulakkeerlugu paasineqanngikkaluartoq, David Boertmann oqarpoq.
Imaassinnaavoq qalasersuup sikuata aakkiartornerata kinguneranik arfiviit Alaska Sibiriallu imartaa aqqutigalugu Tunup avannaanut pisimasut, David Boertmann oqarpoq.