Arctic Umiaq Linemik tigusineq ajunngitsuliornerusoq
Arctic Umiaq Line ukiuni kingullerni 16 millionit koruunit angullugit amigartooruteqartarpoq. Amigartoorutillu Namminersorlutik Oqartussanit qularnaveeqquteqarnikkut matussuserneqartarlutik.
Aappagumiilli Arctic Umiaq Line qularnaveeqquteqarunnaarluni kiffartuussinissamik isumaqatigiissuteqarnikkut ingerlalissaaq.
Umiarsuit silaannakkut angallannermut attuumassuteqanngillat
Taamaammat Air Greenlandip Arctic Umiaq Linemut piginneqataassutsini tunivai. Taamaaliarneq tassanngaannaq pinngilaq. Tassami sivisuaamik eqqarsaataasimavoq.
- Piginneqatigiiffik amigartooruteqarsinnaavoq. Taamaassappallu timmisartuni ilaasorisartakkatta akilertariaqassavaat, tamannalu pissusissamisoorsorinngilarput.
- Aamma umiarsuaq umiarsuaateqarfimmiittussaasoq isumaqarpugut, Søren Lennert Mortensen oqarpoq.
Arctic Umiaq Line ukioq kingulleq 13,4 millionit koruuninik amigartooruteqarmat qularnaveeqquteqarnikkut matussuserneqarput.
Aamma atuaruk RAL-ip Arctic Umiaq Line tamakkiisumik tigugaa
Kiffartuussinissamik isumaqatigiissut suli inissinngitsoq
Kiffartuussinissamik isumaqatigiissut qanorpiaq isikkoqarsanersoq suli aalajangerneqanngilaq, tamannalu Royal Arctic Linep Namminersorlutillu Oqartussat isumaqatigiinniutigisussaassavaat.
Air Greenlandillu isumaqatigiissut qanoq ittuussanera ilisimanngilaa.
- Suleqataassagutta qularnaveeqquteqartariaqassaaq, Lennert Mortensen oqarpoq.
Aamma atuaruk AUL-imi siulittaasoq isumalluartoq
RAL-imi siulersuisut siulittaasuata, Kuno Fenckerip, oqaatigaa Arctic Umiaq Line pilersaarutaareersut malillugit ingerlaannarallassasoq.
Siulittaasoq tunuartoq
RAL-p qullersaqarfiuta siulersuisuisalu Arctic Umiaq Linep qanoq ingerlanneqarnissaa manna aalajangerniartussanngorpaat. Tamakkiisumimmi piginnittuulernermi aningaasanik isaatitsinerulernissaq siunertaanngilaq.
- Pisinitsinnut CSR pissutaavoq. Tassa suliffeqarfittut inuiaqatigiinnut akisussaassusilittut qisuariarneruvoq, Kuno Fencker KNR-imut oqarpoq.
Air Greenlandip piginneqataajunnaarmat Air Greenlandi sinnerlugu Arctic Umiaq Linemi siulersuisuusimasut tunuarput. Tassa flemming Knudsen aamma Mads B. Christensen siulersuisuniikkaluarput.
Maanna siulersuini kiserngorukkallartoq tassaavoq RAL-i sinnerlugu issiasoq Niels Clemensen.