Arctic Sports aamma Dene Games Arctic Winter Gamesimut toqqaapput
Aappaagu Arctic Winter Gameseqarnissaani issittormiut timersuutaanni Arctic Sportsimi aamma Dene Gamesimi Nunatsinniit unamminik pissarsiniarnissaq piareersarneqalereerpoq.
Issittormiut timersornikkut unammiuarnissaat Alaskami illoqarfiup Anchouragep ungasinngisaani Mat-Su-mi aappaagu pissaaq Nunatsinniit, Canadap avannaaniit, Alaskamiit sameniillu peqataaffigineqartumik.
Timersuutini Arctic Sportsimi aamma Dene Gamesimi peqataatitassat maanna toqqarneqareerput.
- Toqqagaasut ilaat siornatigut peqataasareerput aammali nutaartaqartussaallutik, Dene Gamesimi nuna tamakkerlugu sungiusaasoq Suulut Geisler KNR-mut oqarpoq.
- Misileeqqaartussalli eqqarsaatigalugit ilinniarfittut peqataaginnassanngillat. Peqataasunutn tamanut piumasaqaatit assigiipput. Unammeriaatsini tamani ajugaanissaq siunertaralugu sassartarumaarpugut, Suulut Geisler oqarpoq.
Arctic Sportsimi aamma Dene Gamesimi upernaaq Nunatsinni unammersuartoqarmat unammiartortitassanut toqqarallakkanik saqqummiussisoqarpoq.
Orpissuarmi iliuusissat
Nuna tamakkerlugu sungiusaasut aamma ilisimaarivaat unammisartut ilaat Arctic Sportsimi aamma Dene Gamesimi pikkorissuusut Arctic Winter Gameseqarneranilu timersuutit taakku immikkut unammersuarfiusarlutik.
- Dene Gamesimi sungiusaasoq Suulut Geisler peqatigalugu unammisartut unammeriaatsinut taakkununnga pikkorissut oqaloqatigineqarput. Aalajangersimavugut unammisartup timersuutit taakku arlaannut toqqaanissaa ataqqiniarlugu tamatumalu kingorna unammiartortitassanik toqqaalluta, Arctic Sportsimi nuna tamakkerlugu sungiusaasoq Kim Rosing oqarpoq.
Ukioq manna Albertami Arctic Winter Gameseqarnerani Nunatsinneersut Arctic Sportsimi aamma Dene Gamesim angusarissaarput.
Assersuutigalugu nukappiaqqat angutillu inersimasut orpissuarmik ajattaalluni unamminermi pole pushimi ajugaapput.
Ikerasak peqataatitaqarluarpoq
Nuna tamakkerlugu sungiusaasut maanna aappaagu Arctic Winter Games sioqqullugu sungiusaqatigiinnissamut periarfissanik misissuipput.
- Pole pushimi pingaartorujuuvoq taktik atorlugu pisariaqanngitsumik nukersorpallaarnaversaarnissap sungiusarnissaa aammalu ajornartorsiulissagutta qanoq ililluta anigorsinnaaneripput, Suulut Geisler nassuiaavoq.
Toqqakkat illoqarfinni nunaqarfinnilu toqqagaaqatigiittut aamma sungiusarnermi kaammattoqatigiittarput.
- Soorlu siorna Arctic Winter Gameseqarmat misigivarput Ikerasammi nunaqqataasut tapersersuilluartorujussuunerat. Pinngitsoorani nunaqqatigiiaarluni tapersersoqatigiinneq iluaqutaajumaarpoq, Kim Rosing oqarpoq.
Nunaqarfik Ikerasak Arctic Sportsimi Dene Gamesimilu katillugit qulinik peqataatitaqassaaq.