Arctic Prime tunineqarpoq

Savalimmiormiu namminersortoq Hanus Hansen, Qaqortumi ingerlatsivinni Arctic Prime Productionsimi, Arctic Prime Fisheriesimi aamma Arctic Prime Coastalsimi siulersuisuni siulittaasutut ukiuni arfineq-marlunni ingerlatsereerluni siorna oktobarimi tunuartoq, Sermitsiap allaseraa.
Allattoq Mads Lynge
januaarip 06-at 2014 10:56

Piginneqatigiissutit aktiat Islandimi ilaqutariit ingerlataannut tunineqarput, Gudmundur Kristjansson tassani siuttuulluni.

Tunisinermi akigitinneqartoq pillugu illuatungeriit ilisimatitsissuteqarusunngillat, Hanus Hansenilli Sermitsiamut erseqqissaatigaa aningaasat Arctic Prime-imi ingerlatseqatigiiffinnut aningaasaliissutigisimasaat agguaqatigiissillugit Savalimmiormiut matussusersimagaat.

- Kalaallit Nunaanni aningaasarpassuarnik annaasaqarsimavugut, ilanngulugulu Savalimmiuni aningaasaqarniarnikkut tatineqarsimavugut Taamaattumik pisisumit naammaginartumik neqeroorfigineqaratta akuersivugut, Hanus Hansen, Sermitsiamut oqarpoq.

Sulifissuit pingasut, tassa Qaqortumi, Nanortalimmi Kuummiunilu suliffissuit Arctic Prime Productionsip ingerlatarai.

Angallatit avataasiutit angisuut marluk Arctic Prime Fisheriesimit ingerlanneqarput, avatasiutillu mikinerit arlallit taassuma ataani inissisimasup Arctic Prime Coastalip ingerlataralugit.

Ingerlatsiviit akileraarutit ilanngareerlugit katillugit 13,7 millionit koruuninik 2012-imi amigartoorfiupput, amigartoorutit 2011-mut sanilliullugit 10,1 millionit koruuninik amerleriaateqarlutik.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk