Arctic Green Foodimut tapiissutit ilanngarpaat
Aningaasaqarnermut ataatsimiititaliap Naalakkersuisut taama inassuteqarnerat akueraa.
Isumaqatigiissut nutaaq malillugu Arctic Green Food 11 millioner koruuninik ukiortaamiit tapiiffigineqassaaq 2013-mi 7 millioner koruuninut ikilisussanik. Royal Greenland aappaagu 9,5 millioner koruuninik aappaagu tapiiffigineqassaaq aappaaguagulu 7,2 millioner koruuninik.
Tapiissutissat ilaasa landskarsimit aaneqarnissaannut Naalakkersuisut siunnersuutaat aamma aningaasaqarnermut ataatsimiititaliap akueraa.
Pilersaarutit malillugit 2013-ip kingorna suliffeqarfiit taakku imminnut napatilertussaapput. Kukkunersiuisullumi misissuinerat malillugu suliffeqarfiit taakku marluk ukioq kingulleq amigartoorutaat naatsorsuutigisamit annikinnerunnerupput.
- Allatut oqaatigalugu ilimagisamit pitsaanerusumik ingerlasoqarpoq, aningaasaqarnermut ataatsimiititaliat Naalakkersuisunut akissummini allappoq.
