Arctic Circle Race ukioq manna aamma taamaatiinnarpaat
Sakkortuumik timersuummi Arctic Circle Racemi peqataasut pilersaarutit malillugit Sisimiuni Nalunnguarfimmiit tallimanngornermi martsip 26-anni aallartussaagaluarput. Tamannali maanna 2022-mut kinguartinneqarpoq.
Arctic Circle Racemi siulersuisut coronap ernumanartumik siaruaateqqilernera malinnaaffigaat.
AAMMA ATUARUK Arctic Circle Race corona virus peqqutigalugu taamaatiinnarneqarpoq
- Pissutsit ajorsiartuinnarmata taamaatiinnartariaqalerparput. Maannakkut aamma takusinnaalereerparput nunani tamalaani angallannerit unitsinneqarpoq. Taamaattumik taamaatitsiinnassalluta aalajangerpugut, Arctic Circle Racemi siulersuisut siulittaasuat Jens Klaus Lennert KNR-mut oqarpoq.
Corona tunillaatiasoq
Arctic Circle Race siullerpaamik 1997-mi pisoq sakkortuumik timersuutinut ilaavoq, tassami ullut pingasut ingerlaneranni nunanit tamalaaneersut peqataaffigissaannik 160 kilometeri ingerlavigineqartarpoq.
Ukiormanna sisoqqannissaagaluarpoq aamma taamaatiinnarneqarpoq nunanit tamalaaniit aamma peqaasoqartussaagaluarmat.
AAMMA ATUARUK Corona pillugu malittarisassat sivitsorneqartut
- Ukiormannamut pilersaarusiorniarneq pisariuvoq. Tassami illoqarfinnit allanit nalunaaqqaarluni peqataaffigineqartunik Nunatsinni aaqqissuussisoqarsinnaanngilaq, Jens Klaus Lennert oqaluttuarpoq.
- Coronamut akiuussutissalersuineq pissutsit ilorraap tungaanut aallariaatissaattut neriuutigisimagaluarparput. Maannali tassa corona tunillaatiasoq siaruaappoq. Taamaattumik taamaatitsiinnarnissaq avaqqussinnaanngilarput, Jens Klaus Lennert oqarpoq.
Arctic Circle Racep 2022-mi aallartiffissaa maanna ullulerneqartussanngorpoq.