Corona pillugu malittarisassat sivitsorneqartut
Naalakkersuisut nunatsinnut angallanneq tamarmi decembarip ulluisa 30-anni matuaat.
Tamatuma saniatigut corona pillugu malittarisassat apriilip ulluisa 30-annut atortussanngortillugu sivitsorneqarput.
Malittarisassani taakkunani assersuutigalugu inuit qanoq amerlatigisut illup iluani silamilu katersuussinnaanerannut malittarisassaqarpoq. Aammattaaq kommunimit kommunimut allamut angalalluni aaqqissuussinernut peqataajartortoqaqqusaanngilaq.
Katerinnissamut malittarisassat
Inuit amerlanerpaamik 100-it 2021-mi apriilip ulluisa 30-ata tungaanut illup iluani katersuussinnaapput. Silami inuit amerlanerpaamik 250-it katersuussinnaapput.
Kommunimit kommunimut angalaqqusaanngilaq. Namminersorlutik Oqartussat katerinnissat pillugit killilersuinerugallartunut nalunaarutaanni paragraf 2-mi allassimavoq:
"Aaqqissuussanut nalliuttorsiornernullu peqataanissamut nalunaarfigineqartariaqartunut atatillugu inuit kommuninit allaneersut aaqqissuussamut peqataanissamut nalunaarsinnaannginnissaat aaqqissuussisup qulakkiissavaa."
Malittarisassanit taakkunani suliffeqarfeqarfiit pisortallu suliffeqarfiisa inimik qanoq aaqqissuussinissaannut aamma piumasaqaateqarpoq.
AAMMA ATUARUK Kim Kielsen: Ukioq manna pissartanngorniuttoqassanngilaq
Assersuutigalugu qatserisartut inimi isersimasoqarsinnaassutsitut akuerisaasa appaannaat isersimasinnaatitaapput.
Aammattaaq atuisartunut isertussanut imermik errortorfissamik tunillannartuiaammilluunniit periarfissaqartitsisoqassaaq.
Timersortartut peqatigiiffiisa sivitsuisoqarnissaa utaqqimaaraat
Corona pillugu malittarisassat 2021-mi januaarip ulluisa 31-anni atorunnaartussaagaluarput. Taakkuli maanna qaammatinik pingasunik sivitsorneqarput.
Corona pillugu killilersuinerit nunatsinni assigiinngitsuni 2020-mi pissartanngorniuttoqarnissaannut ajornakusoortitsipajaartut aamma sivitsorneqarput.
Arsaattartut Kattuffiata, KAK-p isikkamik arsaannermik pissartanngorniuttoqarnissaanut akuersissuteqarfiginissani aasaq sukataarutigigaluarpaa. Tamannali Naalakkersuisut siulittaasuata Kim Kielsenip tusagassiortunik aggustimi katersortitsinermi periarfissaatikkunnaarpaa.
AAMMA ATUARUK Katuaq corona pillugu malittarisassat pillugit: Susinnaanerluta paasisinnaanngilarput
Tamatuma kingorna timersortartut peqatigiiffiisa killilersuinerit sivitsorneqassanersut ukioq mannalu januaarip ulluisa 31-ata kingornanut atuutissanersut utaqqimaalerpaat.
Aammattaaq kulturikkut illorsuit nunatsinniittut soorlu Nuummi Katuaq Sisimiunilu Taseralik inuit aalajangersimasunik amerlassusillit taamaallaat isertissinnaagamikkit aningaasanik aaviiartitsiniarnerat ajornakusoorsimavoq.