Aqutsisoqatigiit nutaat nunatsinni meeqqat amerlanerusut akiuussuserneqartalernissaanut qulakkeerissasut
Nunatsinni meeqqat tamarmik pingajorarterutaat tikillugit akiuussuserneqartariaqarnerminnik akiuussuserneqartanngitsut KNR-imit septembarimi saqqummersitsinitta kingorna peqqinnissamut Naalakkersuisoq, Mimi Karlsen iliuuseqarniarluni neriorsuivoq.
AAMMA ATUARUK Angajoqqaat qitornamik akiuussuserneqarnissaannik puigortarnerannut akisussaaqataavugut
Iliuuseqarnerlu taanna aqutsisoqatigiinnik peqqinnissaqarfimmi, Nakorsaaneqarfimmi Peqqinnissamullu Naalakkerusuisoqarfimmit aqutsisunik inuttaqartoq manna pilersitsinermik kinguneqarpoq.
Aqutsisoqatigiit ajornartorsiutaasumik qanoq ililluni pitsaanerpaamik aaqqiissuteqartoqarsinnaanersoq aqutsisoqatigiit novembarip naanerani siullermeerlutik oqaloqatigiissutigissavaat.
Peqqinnissamut Naalakkersuisoqarfik KNR-imut paasissutissiivoq.
Illoqarfinnit annernit nunaqarfinni pitsaanerusoq
Meeqqat akiuussuserneqartannginnerannut angajoqqaat akornanni akiuussutissanut qularutiginninnerat ilimagineqarsinnaagaluartoq tamanna pissutaanngilaq. Tamanna annermik angajoqqaat puigutunerannik pissuteqarnerusoq, Nunap immikkoortuani Sermersuumi nakorsaaneq, Jesper Olsen oqarpoq.
Taamaammat meeqqat nunaqarfinniittut illoqarfinnit annerusuneersunit amerlanerusut akiuussuserneqartarnerat takuneqarsinnaavoq. Tamanna nunaqarfinni akiuussuserneqartussanik ujarlerniarnerup ajornannginneruneranik pissuteqarnissaa ilimanarluinnarpoq, taamaalillunilu angajoqqaat meeqqami akiuussuserneqarnissaannik eqqaasinneqarluarnerusinnaasarlutik.
Nalunaarsuiffik: Kalaallit Nunaanni Peqqinnissaqarfik.
Nassuiaatigineqartoq taanna nakorsaanerup, Henrik L. Hansenip taperserpaa.
Nunatsinni akiuussusersuinerit kinguaqqaqisut
Meeqqat nukillaarnermut akiuussutissamik pingasoriarlutik kapitissimasut:
- Nunatsinni 78 procentiupput
- Danmarkimi 96 procentiupput
- Nunarsuaq tamakkerlugu 80 procentiupput
Meeqqat mæslinginut marloriarlutik kapitissimasut:
- Nunatsinni Grønland 66 procentiupput
- Danmarkimi 91 procentiupput
- Nunarsuaq tamakkerlugu 71 procentiupput
- Peqqinnissaqarfiup akiuussusertinnissamut aggersaasarnera ileqquusimavoq, tamannalu nunap ilaani suli atuuppoq. Nuummili akiuussusersuinermut aggersaasoqartanngilaq. Angajoqqaammi nammineerlutik meeqqami akiussusertinnnissat qulakkiigassaraat, Henrik L. Hansen KNR-imut septembarimi oqarpoq.
Taassumalu meeqqat akiuussuserneqanngitsorpassuit assersuutigalugu mæslingimik nunatsinni tuniluuttoqaleratarsinnaaneranut pissutaasinnaasoq nassuiaatigaa.
Taamaammat nakorsaanerup, nunallu immikkoortuani nakorsaanerup ajornartorsiutaasoq aaqqiivigineqartariaqarsoraat.
Tamannalu aqutsisoqatigiit nutaat qaammatip naanerani ataatsimeerngaarnerminni oqaloqatigiissutigissavaat.
Inuit kikkorpiaat ataatsimiinnermi peqataanissaasa paasiniarnerat KNR-imit iluatsinngilarput.