Emanuel Nûko aalajangiiffigineqartoq: Aqqusinermi eqqissiviilliortitsineq kommunalbestyrelsimiikkunnaarneranik kinguneqartoq

Ukiut pingasut matuma siorna unnummi eqqissiviilliortitsisoqarnera Naleqqameersup Inatsisartuni Kommuneqarfik Sermersuumilu kommunalbestyrelsimi ilaasortaasinnaanngitsutut nalunaarutigineqarneranik kinguneqarpoq.

Allattoq Kim Hinrichsen

juulip 19-at 2024 12:09

Naleqqameersup Emanuel Nûkop eqqissiviilliortitsineq pissutigalugu 1500 koruuninik akiligassinneqarsimanera pissutigalugu Inatsisartuni ilaasortaasinnaanngitsoq upernaakkut ataatsimiinnermi matumani aalajangerneqarpoq.

Emanuel Nûko Kommuneqarfik Sermersuumi kommunalbestyrelsimi aamma ilaasortaasinnaanngitsoq, Qinigaasinnaanermut Ataatsimiititaliap maanna aamma aalajangerpaa.

Tamanna qinikkap Tasiilami 2021-mi maajimi unnuit ilaanni sakkortuumik pissusilersuuteqartutut eqqissiviilliortitsisutullu tigusarineqarneranik pissuteqarpoq.

Aamma atuarukEmanuel Nûko Inatsisartuniikkunnaarpoq

Suliaq 2023-mi juulip 18-iani aalajangiiffigineqarpoq, Nûkolu nakuusersimasutut unnerluutigineqarnermi pinngitsuutinneqarpoq, aqqusinermili eqqissiviilliortitsisimasutut eqqartuunneqarluni. Eqqartuussut taanna aallaqqaammut 1500 koruuninik akiligassinneqarneranik kinguneqarpoq.

Eqqartuussuteqartoqarneranit ukioq ataaseq qaangiuttoq taassuma Kommuneqarfik Sermersuumi politikkikkut suliaqarsinnaajunnaarneranik aamma kinguneqarpoq, tassami kommunalbestyrelsimi ilaasortaasinnaajunnaartoq aalajangerneqarpoq.

SULIAQ EMANUEL NÛKOMUT TUNNGASOQ PILLUGU

Emmanuel Nûko Tasiilami nakuuserniartutut pissusilersorsimanera tamanullu ammasumi toqqissiviilliortitsisimasutut maajip ulluisa 16-ianni 2021-mi unnukkut nalunaaqutaq qulinngoriitsiartoq tigusarineqarpoq. Tamanna unnerluussummi KNR-ip pissariarisaani allassimavoq.

Inatsisartunut ilaasortaq 15-it 20-llu akornanni imigaqarsimasoq unnerluussummi allassimavoq.

Emanuel Nûko tamatuma kingorna inummut allamut nipituuliorluni assortuussuteqartoq, kingornalu arlaleriarluni niaquatigut annersillugulu uppisillugu ajassimagaa, allassimavoq.

Politiit aggersarneqarmata, politiinit eqqissisarneqaraluarpoq, iluatsinngitsumilli.

Taanna nikorfaffimminit nikissanngitsoq marloriarluni politiinit oqarfigineqaraluarpoq. Taannali pinaaserluni politiinut tallini atorlugit annersitsisimasoq unnerluussummi allassimavoq.

Politiit tamanna pissutigalugu qasilitsortalimmik seqqaallutillu tigusarinnipput.

Naleqamit politikeri aamma Inatsisartunut ilaasortaq unnerluussutinut marlunnut Eqqartuussisoqarfik Sermersuumit februaarip aqqaneq-aappaani pinngitsuutinneqarpoq.

Unnerluussisussaatitaasut taassuma ulluni 30-ni pineqaatissinneqarsimasunut inissiisarfimmiittussanngortinneqarnissaa piumasarigaluarpaat.

Unnerluussut naapertorlugu Emanuel Nûko unnerluutigineqarpoq politiit malittarisassaannik unioqqutitsisimasutut Kommuneqarfik Sermersuup malittarisassaanik paragraf 18-ip immikkoortuani 3-mik kiisalu pinerluttulerinermik inatsimmik 88-mik unioqqutitsisimasutut.

Allisiguk