Emanuel Nûko Inatsisartuniikkunnaarpoq

Emanuel Nûko Nunatta Eqqartuussisuuneqarfianit nakuusersimasutut eqqartuunneqarluni akiligassinneqarsimammat politikereqataasa Inatsisartuniit anisippaat.

Allattoq Nicole Sander Bertelsen

apriilip 12-at 2024 10:56

Nutserisoq Alice Sørensen

Naqqiissut: Emanuel Nûko nakuusersimasutut Nunatta Eqqartuussivianit eqqartuunneqarsimasoq ilanngutassiami siusinnerusukkut allassimagaluarpoq. Taanna nakuusersimasutut pinngitsuutinneqarpoq, tamanullu ammasumik toqqissiviilliortitsisimasutut akiligassinneqarluni. KNR-ip kukkuneq ajuusaarutigaa.

Sisamanngorneq ulloq tassaavoq Emanuel Nûkop Inatsisartuni ataatsimeeqataaffia kingulleq.

Tamanna nunatsinni qinikkat amerlanerussuteqartut taassuma ilaasortaaginnarsinnaannginneranik aalajangernerannik pissuteqarpoq. Tamanullu ammasumik toqqissiviilliortitsisimasutut akiligassinneqarsimanera tamatumani pissutaavoq.

SULIAQ EMANUEL NÛKOMUT TUNNGASOQ PILLUGU

Emmanuel Nûko Tasiilami nakuuserniartutut pissusilersorsimanera tamanullu ammasumi toqqissiviilliortitsisimasutut maajip ulluisa 16-ianni 2021-mi unnukkut nalunaaqutaq qulinngoriitsiartoq tigusarineqarpoq. Tamanna unnerluussummi KNR-ip pissariarisaani allassimavoq.

Inatsisartunut ilaasortaq 15-it 20-llu akornanni imigaqarsimasoq unnerluussummi allassimavoq.

Emanuel Nûko tamatuma kingorna inummut allamut nipituuliorluni assortuussuteqartoq, kingornalu arlaleriarluni niaquatigut annersillugulu uppisillugu ajassimagaa, allassimavoq.

Politiit aggersarneqarmata, politiinit eqqissisarneqaraluarpoq, iluatsinngitsumilli.

Taanna nikorfaffimminit nikissanngitsoq marloriarluni politiinit oqarfigineqaraluarpoq. Taannali pinaaserluni politiinut tallini atorlugit annersitsisimasoq unnerluussummi allassimavoq.

Politiit tamanna pissutigalugu qasilitsortalimmik seqqaallutillu tigusarinnipput.

Naleqamit politikeri aamma Inatsisartunut ilaasortaq unnerluussutinut marlunnut Eqqartuussisoqarfik Sermersuumit februaarip aqqaneq-aappaani pinngitsuutinneqarpoq.

Unnerluussisussaatitaasut taassuma ulluni 30-ni pineqaatissinneqarsimasunut inissiisarfimmiittussanngortinneqarnissaa piumasarigaluarpaat.

Unnerluussut naapertorlugu Emanuel Nûko unnerluutigineqarpoq politiit malittarisassaannik unioqqutitsisimasutut Kommuneqarfik Sermersuup malittarisassaanik paragraf 18-ip immikkoortuani 3-mik kiisalu pinerluttulerinermik inatsimmik 88-mik unioqqutitsisimasutut.

Allisiguk

Ilaasortaajunnaarninilu ajortumik isiginngikkini inuttaata KNR-imut oqaatigaa:

- Inuttut annertoorujussuarmik uannut sunniuteqanngilaq, tassa qangali aalajangiunneqarmat qaqinneqarumaartoq taamaattumik piareersimaffigaara aamma ataqqilluinnarpara taama aalajangernerat, Emanuel Nûko oqarpoq.

"Inatsisartuniikkunnarpunga, ajuusaartut amerlaqaat, qinersinissap tulliani sassaqqissaanga ilissi pillusi" Emanuel Nûko Facebookimi ilaatigut taama allappoq.

Unniinnarnianngilaq

Politikeri Naleqqameersoq Inatsisartuniikkunnaareeraluarluni uniinnarniarani oqarpoq.

- Qinersinissami tullermi qineqqusaaqqissaanga, inuiaqatigiit atugaasa pitsanngorsarnissaat sulissutigiuassavara. taanna oqarpoq.

Nunatta Eqqartuussisuuneqarfiani eqqartuunneqannginnermini, Eqqartuussiveqarfik Sermersuumi ukioq kingulleq februaarimi nakuusersimasutut eqqartuunneqarpoq pinngitsuutitaallunilu. Taamali aalajangerneq akerleralugu unnerluussisussaatitaasut suliamik Nunatta Eqqartuussisuuneqarfianut ingerlatitseqqipput.

Pisortani sulisunut akornusersuisimasutut eqqartuussisumit pisuutinneqarpoq akiligassinneqarlunilu.

Sermitsiaq AG-mi allaaserineqartoq naapertorlugu Emanuel Nûko Inatsisartuni Mette Hammekenimit Ittoqqortorrmiineersumit paarlanneqassaaq.