Aqqartartuaqqami ilummut qaarnikumi nassaarineqartut inuit timaasa ilamernganeersuussangatinneqartut
Aqqartartuaqqap Titanimik atillip ilummut qaarsimassangatinneqartumeersut inuit timaasa ilamernganinngaanneersuussangatinneqartut ippassaq nassaarineqartut, Amerikap sineriaani nakkutilliisut nalunaarput.
Aqqartartuaraq ”Titan” juunip 18-ianili maqaasineqarpoq. Tassanngaanneersullu sinnikumerngit ippassaq pingasunngornermi nassaarineqarsimasut, nutaarsiassaqartitsivik Sky News allappoq, taannalu naapertorlugu umiarsuaq Horizon Arctic umiarsualivimmi Newfoundlandimi St. Johnsip aammalu Canadap kangimut sineriaaniittup Labradorip nalaaniissimavoq.
Aqqartartuaraq takornariartaataanerusoq ”Titan” juunip 18-ianili maqaasineqarpoq, taanna umiarsuarmut qanga umiusimasumut Titanicimut alakkaaniarluni 3800 meterisut ititigisumiittumut aqqarpoq, tamatumalu kingorna nunarsuarmi tamanit malinnaaffigineqartumik ujaasinersuaqalerpoq.
Ullullu sisamat qaangiummata robotti aqqartartoq atorlugu aqqartartuaqqap tunuatungaa aseqquilu allat sisamat nassaarineqarput.
Tamatumalu kingorna ilimatsaanneqarpoq aqqartartuaraq tasamani immap naqqani naqitsinerujussuaq pissutigalugu ilummut qaarsimassasoq, nassuiarneqarporlu ilummut qaarneq taanna silammut qaarnermiit allaanerusartoq tassami taamatut ilummut qaariaaseq tassanngaannarsuaq pisarsimavoq.
Inuit tallimat aqqartartuaqqami issimasuupput, Amerikallu sineriammi nakkutilliisui naapertorlugit issimasut tamarmik aqqartartuaqqap ilummut qaarnerata kingunerisaanik ajunaarput.
