Aqqaluaq B. Egedep tatiginninnginnermik taasisoqarnissaa anigoraa

Aqqalu C. Jerimiassenip (Atassut) oqaaseqarneranik ilallugu nutarterneqarpoq.

Inatsisartut aatsitassanut inatseqarnermullu naalakkersuisumut, Aqqaluaq B. Egedemut (IA) tatiginninnerlutik ullumik taasissutigisussaavaat.

Tatiginninnginnermik taasineq taassuma aatsitassanut inatsimmut nutaamut siunnersuummik isumaginninnera pissutigalugu Demokraatit, Atassut Nalerarlu taassuminnga tatiginnikkunnaarlutik oqaaseqarnerisa kingorna pivoq.

Inatsisartuni unikkallarnerup kingorna naalakkersuisoqatigiit tassa Siumut IA-lu Aqqaluaq B. Egedemut tatiginninninnerminnik siunnersuuteqarput.

Tatiginnikkunnaarnissamik taasinissaq taamaalilluni pinngitsoortinneqarpoq, ilaasortammi 16-it tatiginninnerartut tallimaannaat tatiginninnginnerarput. Taasinngitsoqanngilaq.

Innuttaasunik akuutitsinngitsoq

Illuatungiliuttut Aqqaluaq B. Egede suliamik naammattumik kivitsisimanngissoraat. Atassutip siulittaasua, Aqqalu C. Jerimiassen ataatsimiittarfimmi oqarpoq.

- Aatsitassanut inatsimmiut allannguutissat, allannguutit arlalissuit Inatsisartuni suliarineqarnerini ajoraluartumik aatsitassanut, inatsisinullu atuutsinneqarnerinut naalakkersuisoq sammisami pineqartumi piginnaasariaqakkat naammattumik piginngikkai isumaqarluta, taanna oqarpoq, nangillunilu:

- Sulinermini innuttaasut inuussutissarsiuteqartullu naammattumik peqataatissimanngilai, taamatuttaarlu Inatsisartut naammattumik peqataatissamanagillu tusarniarsimanngilai.

Aqqaluaq B. Egede oqaaseqartarfimmit ima oqarpoq:

- Inatsisartut ullumikkut tatiginnikkunnaarnermik nalunaaruteqarnissamut periarfissaqarput. Tamanna sooorunami ataqqivarput, inernissaalu soorunami ataqqillugit.

Taannali Inatsisartunit peqqussutit malillugit iliuuseqarsimasorivoq.

- Naalakkersuisutut tunuarsimaarnanga oqassaanga Inatsisartut piffissaliussaat malillugit suliaqartarama.

Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Peter Olsen pillugu tatiginnikkunnaarnermik marlunngornermi siunnersuuteqartoqarpoq. Taannali taasisoqanngitsorluunniit tunuarpoq.