Aqqaluaq B. Egede: Nammineerluta aatsitassarsiornissamut aningaasaliisariaqarpugut
- Naak aningaasat nunatsinni sulisinneqarnissaat pisariaqarluinnaraluartoq nunatta avataaniit kajumittoqarnera ukiuni kingullerni sakkortuumik innarlerneqarpoq.
Aqqaluaq B. Egede inatsisartuni aningaasaqarnikkut ingerlatsineq pillugu nalunaarusiaq oqallisigineqarnerani taama oqarpoq.
Patajaassusermik pilersitsiniarpoq
Oqaaseqarnerminilu erseqqissarpaa, Kalaallit Nunaata aatsitassarsiorfissatut kajuminnassusaa aningaasaliisartunit naliliineq malillugu nr. 9-imi nunarput inissisimagaluarluni massakkut nr. 41-mut apparujussuarnikuummat.
- Tassa soqutiginanngilluinnarnerit ilaannut inississimavugut. Tassani patsisaavoq, Naalakkersuinikkut tutsuiginartumik ingerlatsinnginneq, aningaasaqarnikkut aqutsilluannginneq taavalu inuiaqatigiinni isumaqatigiinnginnerujussuaq, aatsitassarsiortut nunatsinnut tatiginnissinnaanerannut killiliivoq, Aqqaluaq B. Egede oqarpoq.
Isornartorsiuinerlu aningaasaqarnermut aatsitassanullu naalakkersuisup Andreas Uldummip isumaqatiginngilaa.
- Taanna isumaqatiginngilluinnarpara, uanga isumaqarneruvunga sangujoraartumik politikkikkut namminneq ingerlatsisimanerannut innarlerneqarsimasoq, taamaammat isumaqatiginngilluinnarpara taamatut uagut pisuutinniarneqassagutta naalakkersuisuni. Uagut kissaatiginerpaavarput massakkut patajaatsumik aatsitassarsiornermi sinaakkutaasut ingerlanneqassasut, suliffissanik pilersitsiniassagatta taassumalu kingunerisaanik aamma akileraarutitigut isaatitsilerniassagatta. Taamaammat isumaqatiginngilluinnarpara oqariartuut taamaattoq, Andreas Uldum oqarpoq.
Suminngaanneerneri apeqqutaatinneqanngillat
Qanorli iluatsinneqarsinnaanera IA-mit siunnersuutigineqarpoq:
- Nunatta avataanut isigivallaarunnaarluta inuiaqatigiit imminnut aallaavigaluta aatsitassarsiornermi inerisaasinnaanerput aqqutissiunniartariaqarparput. Nunarput tamarmi qularnaveeqqutaavoq, taamaammat aningaasarsiornerup silarsuaani annilaanganartortaqanngilaq nammineq ingerlatsisinnaanerput maani nunami, Aqqaluaq B. Egede oqarpoq.
Siunnersuutaasorli Naalakkersuisunit taperserneqarpoq.
- Tassami aningaasat suminngaanneerneri apeqqutaanngillat aningaasaliissoqassatillugu aallartittoqarnissaanut, taamaammat suliffeqarfiit pilersinneqarnissaat akileraarutitigullu isaasoqalernissaa taanna pingaarnerpaavoq, Aningaasaqarnermut aatsitassanullu Naalakkersuisoq Andreas Uldum taama oqarpoq.
