Qamuteralattartut peqatigiiffiat: Aputip sisoornissaa mianersuuguk, kisimiillutillu angalanngisaannarit
Isigisaq tamarmi apummik ulissimasumut qaqqalialersaarluni, imaaliallaannarluni illoqarfiup qimalaarsinnaanera takorlooruk.
Qamuteralannik imatut iliorsinnaavutit.
Nuummi qamuteralattartut peqatigiiffiata Qamutit haliani tamakkuninnga ulikkaarpoq. Amerlanerit aamma suli silataaniipput.
- Qamuteralannut teknologii pitsanngornikorujussuuvoq; qamuteqaralannik sumulluunniit tiffasikkaluarpat portugaluarpalluunniit angalariaannaavutit. Taamaammat timersuut nuannarineqarluartuuvoq, qamuteralattartut peqatigiiffiani upalungaarsimanermi nammineq kajumissutimik ikiuuttartuni ilaasortaq pilersitseqataasuusorlu, Lars Borris Pedersen oqarpoq.
- Mianersoraannimi timersuut peqqinnartuuvoq. Pinnguaatigalugumi ulorianarsinnaavoq, taanna taama oqarpoq.
Nuummi qamuteralattartut peqatigiiffiata kajumissutsimik ujaasisartut annaassiniartartullu 2011-mi pilersippaa.
Qamuteralattartut peqatigiiffiannit Qamutinit ilaasortaasut 15-iupput, taakkulu politiit, qatserisartut aamma Issittumi Sakkutooqarfik ujaasinerni annaassiniarnernilu ukioq ikiuupput.
Nunatsinni annaassiniarnermi suliassaasartut amerlanerpaartaat aasami pisaraluartut, perlasinerit aamma ukiumi pisarput. Pinngortitami perlasisoqartillugu, nunatsinni oqartussaasut upalungaarsimasut, issinnera aputeqarneralu pissutigalugit inunnik ikiuiniarnissaat ajornakusoorsinnaasarpoq.
- Ulluinnarni qamuteralattartuugatta, asimiinnermik ilisimasaqarluartuullutalu nunap ilaanik paasisimasaqarluartuugattaaq – ikiuunnissatsinnik neqeroorutta iluaqutaangaatsiarsinnaasoq isumaqarpugut, Lars Borris Pedersen oqarpoq.
Apummik sisoortoqarsinnaaneranik aarlerisaarineq
Qujanartumik qaqqamiitsilluni perlasinissaraluamut inuttut imminut ikiorsersinnaanermik periarfissaqarluartarmat. Tassa soorlu atortut pingaaruteqarluinnartut nassarnerisigut, apummillu sisoortoqaratarsinnaaneranik alapernaaqqissaartarnissaq pingaaruteqarpoq.
- Uagutsinnut attaveqaqqaartarnissaq ajunnginnerpaassaaq. Apummik sisoortoqaratarsinnaanermik facebookimi quppernitsinnittaaq aarlerisaaruteqartarpugut, taanna oqarpoq.
Apummik sisoortoqartillugu, tamanna pisuttunit, sisorartunit imaluunniit qamuteralattunit aputip aqqutalugineqarneranik pissuteqakkajuppoq.
Issangiarsimariarluni aperujussuarsimatillugu aputip sisoornissaanut aarlerinarnerpaasarpoq, taamaattumik qamuteralalertinnani silasioqqaartarnissaq aarlerinaannerpasartoq, Lars Borris Pedersen oqarpoq.
- Ulloq ataaseq arlallilluunniit sioqqullugit anorersuarsimatillugu, masannartuliungaatsiarluni issangersimagaangat mianersorluinnartariaqarpoq, taanna oqarpoq.
Qamuteralannik perlasinerinnaanngitsut
Ukiukkut Qamutit peqatigiiffiani kajumissutsiminnik upalungaarsimasuni ilaasortat, aputip sisoornerani perlasinerit imaluunniit qamuteralannik sukkalisaarniartartut kisiisa orniguffigineq ajorpaat,
Aammali sisorartartut inuillu pisuttuartillutik ajornartorsiulertut orniguffigisarpaat.
- Nunakkut pisuttut, soorlu quaallutik, nakkarlutik ajoqusersimallutik nammineerlutik angerlarneq ajuleqqasut. Inuit isorartuumut pisutsillutik, immaqa piginnaanitik akimorlugit imminnut ilimasuffigisimagaluarlutik, qasullutik nukissaaruteriasaartut orniguffisarpavut, taanna oqarpoq.
Nuunnerugaanni imaluunniit nunami aputeqarlunilu sermilimmiinneq misilittagaqarfiginngikkaani, misilittagalimmik apersueqqaarnissaq pitsaanerpaassaaq.
Tamatuma saniatigut kisimiilluni qaqqiannginnissaq, Lars Borris Pedersenip inassutigaa. Taamaakkaluartorli kisimiilluni qaqqiaraanni, allanut oqaatiginissaa eqqaamasariaqarpoq.
Kammalaammik ilalerluni qaqqiarniaraanni isumannaallisaatilisarluarluni, eqqaamallugu sumut ingerlassanerluni oqaatigisimallugu, Lars Borris Pedersenip oqarneratut eqqaamasassat kingulliit tassaapput:
- Taquaqarluarlunilu isumagissaarluarnissaq.
