Aput sisoormat Qamutit annaassiniartartuisa ilatik marluk ujarpaat
![](/sites/default/files/styles/image_934x467/public/2024-02/Lars%20Borris%20Pedersen.png?itok=WHuhE4V6)
Angutit marluk 22-nik ukiullit snescooterertillutik aputip sisoorneranit matoorussaalutik marlunngornermi unnukkut Nuummi ajunaarput.
Annaassiniarneq annertooq Issitumi Sakkutooqarfimmit politiinillu ingerlanneqarpoq, snescooterertartullu peqatigiiffiata Qamutit annaassiniartartui aamma ujaaseqataapput.
Lars Borris ujaasisunut ilaavoq.
- Annaassiniarnermi arfinillit arfineq-marluk missaanniilluta ujaaseqataavugut. Uagut misilittagaqareersut ajunnginneruvugut, ilagulli marlussuit siullermeerlutik annaassiniaqataasut attortisimapput. Lars Borris KNR-imut ippassaq taama oqarpoq.
Ajornerpaamik takusaqarnissarput ilimagiuaannarparput
Lars Borris Qamutiniillu annaassiniaqataasut pisoq pillugu itinerusumik oqaluttuarusunngikkallarput, pisoq qanippallaarmat. Ilaasortatimmi marluk apummi matoorussaasimasut ujaarineqarneranni ikiuupput. Peqatigiiffimmili annaassiniarnermik sungiusartarnitik pillugit oqaluttuarusuppoq.
- Pisuni ilungersunartuni oqartussat peqatigiiffimmiit ikiortarpavut. Ujaasinerit ajoqusernerit imaluunniit ajunaarnerit pisutut ilungersunartutut isigineqartarput. Taamaammat ajornerpaamik takusaqarnissarput ilimagisarparput, taanna oqarpoq.
- Apummik sisoortoqarsimatillugu pisoqarfimmi isumannaallisaasarpugut. Inunnik ujaasinermik assaanermik ikiueqqaarnermillu ilisimasaqarpugut. Aputip sisoornera marlunngornermi unnukkut pisoq ajutoornertut nalinginnaasutut taaneqarsinnaavoq.
Aputip sisoorsinnaanera ilimanartoq
Aputip sisoorsinnaaneranik ilimasaarisoqaqqammerpoq. Ullualuit matuma siorna snescooterertartut peqatigiiffiat Facebookimi quppernerminnit ima siammarteripput: “Nuummi apummik sisoortoqarsinnaaneranik ilimasaarut”
Sapaatip akunnerata naanerani kingullermi illoqarfiit pingaarnersaat apingaatsiarpoq, aperlaajummallu illoqarfik eqqaalu apummik aqitsumik poorneqarpoq
- Ukioq manna ukiuunerani issisiut qullartarlunilu appartarpoq, siallereeraangallu issileqqittarluni. Taamaanneralu aputip sisoorsinnaaneranik ilimanarnerulersitsivoq soorlu marlunngornermi unnukkut taama pisoqartoq, Lars Borris taama oqarpoq.
- Aputip sisoorneri amerlanerusut ukiuni kingullerni takussaapput aammami pisarnermit maluginiarneqarnerupput. Sila allanngoraqaaq issisiullu nikeraqaluni siallilertarpoq apisarlunilu, apullu taama qaleriiaattoq sisunissamut ilimanarnerusarpoq.
Qamutit annaassiniartartui Islandimi annaassinniartartunut pikkorissariarsimapput, apummillu sisoortoqartillugu annaassiniarnermik ilitsersuisutut aamma allagartaqarput.
Taamaammallu Lars Borris tamanut kaammattuusissaqarpoq. Radiomik nassitsissut Beaconimik taasagaat ulikkaarlugu sarfalersortarsiuk. Taannami ikumatilluni nammineerluni satellitsikkut nakkutilliissummut sumiiffimmiit kalerrisaarisarpoq. Taamaalillunilu ajutoortut annaassiniartunit sukkasuumik nassaarineqarsinnaapput ikiorneqarlutillu.
Snescooterertut 30-t 40-llu missaanniitut marlunngornermi unnukkut ujaaseqataaput, Qamutit annaassiniartartuisa saniatigut kajumissutsiminnik ikiuuttoqarpoq.
![](/sites/default/files/styles/image_934x467/public/2024-02/27e96510-3c61-4b50-b56f-50597e884de6.jpeg?itok=SJRQ8zXd)