Aput sisoormat ujaasinermi ikiuuttut upalungaarsimasullu ataqatigiillutik annaassiniarput
Nuup eqqaani Aqqiitsumi aput sisoormat angutit marluk 22-nik ukiullit alianaqisumik ippassaq unnukkut ajunaarput.
Aputip sisoornera nalunaaqutaq 17:30 politiinut kalerriutigineqarpoq annaassiniarnerlu annertooq aallartinneqarluni. Qatserisartut, Issittumi Sakkutooqarfik aamma snescooterertartut peqatigiiffianni Qamutini ilaasortat ikiuupput.
Angutit taakku nassaarineqarnissaat anguniarlugu sulisut assoroornerat aalajangiisuusoq, politiit upalungaarsimanermi pisortaat Brian Thomsen oqarpoq.
- Nassaarineqartoq siulleq ajoraluartumik toqungasoq nassaarineqarpoq uummarsarneqalerlunilu. Angutip aappaa aamma toqungasoq akunnerup ataatsip missaata qaangiunnerani nassaarineqarpoq.
Angutit nassaarineqarfianni uummarsaalluni ikiueqqaarneq aallartinneqartoq timmisartumi ambulanceni napparsimavimmilu aamma ingerlanneqarpoq. Angutilli taakku marluk annaanneqarsinnaasimanngillat.
Angutit taakku marluk snescooterimik ingerlatsisut sillimaniarnermut atortorissaarutinik eqqortunik nassataqarsimasut politiit upalungaarsimanermi pisortaata ilanngullugu oqaatigaa
Kajumissutsiminnik ikiuukkumasorpassuit
Ujaasineq annaassiniarnerlu assigiingitsorpassuarnit peqataaffigineqartoq suliassarujussuullunilu ataqatigiissaarluagassaasimasoq Brian Thomsen nassuiaavoq.
Snescooterertartut peqatigiiffianni Qamutini ilaasortat annaassiniartartui kajumissutsiminnik ujaaseqataasut ilaatigut immikkut maluginiarpai.
- Apummik sisoortoqartillugu ajutoortunik annaassiniarnermik ilinniagaqarput, taakkulu ikiuunnerat assut iluaqutigaarput.
Snescootererlutik ikiuuttut katillugit 30-t 40-llu missaanniittut ujaaseqataasut peqatigiiffiup siulersuisui Facebookimi allapput.
- Nuup eqqaani Aqqiitsumi ippassaq aputip sisoornerani inuusuttut marluk alianangaartumik ajunaarnerat oqaasertaleruminaappoq, peqatigiiffimmiit taama allapput.
- Ajunaarneq alianaqaaq, ilaqutaasullu eqqarsaatitsinniipput qamanngavillu misiginneqatigingaarpagut.
Angutit ajunaartut marluk peqatigiiffimmi Qamutini ilaasortaarnerat peqatigiiffiup siulittaasuata Dan Jeppsonip uppernarsarpaa.
Nunami imaani silaannarmilu upalungaarsimasut
Kajumissutsiminnik ujaaseqataasut kisimik annaassiniarnermi ikiuutinngillat.
Angutit taakku marluk 22-nik ukiullit sumiiffimmiit ingerlanneqarnerat Issittumi Sakkutooqarfiup qulimiguuliutaa annaassiniut atorlugu ilaatigut aamma ikiuuttoqarpoq.
Nuummi Qatserisartut annaassiniarnermi ikiuuttut aamma amerlapput.
Katillugit inuit 14-it taakkunannga aqutsisut arlallit annaassiniarnermi suleqataasimasut, upalungaarsimanermi pisortaq Jes Damgaard paasissutissiivoq.
- Annaassiniaqataasussat apummik sisoortoqartillugu ikiuinermi atortorissaarutinik nassartillugit snescooterinik taakunngartippagut, taanna oqarpoq.
- Pinasuartumik napparsimaviliaassassaqaqinammat umiatsiaq aamma aallartipparput, taannalu pisoqarfiup eqqaani sissami piareersimavoq.
Ajunaarnerup pinerata kinguninngua nalaataqartunut ikiuigasuarneq qatserisarfimmi aallartinneqarpoq, ilaqutaasut pisariaqartitsisullu tarnip pissusaanik ilisimasalimmik oqaloqateqarsinnaallutik.
