Nuummi maqaasineqartut marluk ajunaarput

Kalaallit Nunaanni Politiit paasissutissaataat malillugit nalunaaqutaq 21:30 nutartigaq.

Aqqitsup eqqaani misissuisoqartoq nunatsinni Politiit Facebookimi quppernerminni marlunngornermi unnukkut paasissutissiipput.

Inuit arlallit snescooterertut maqaasineqartut politiinut nalunaarutigineqarpoq. Apummillu sisoortoqarsimanera ujaasinermi pasitsaanneqarpoq.

Politiit qatserisartut snescooterertartut peqatigiiffiat aamma Nuummi innuttaasut maqaasineqartunik ujaaseqataapput.

Inuit marluk snescooterinik aquttut toqungasut nassaarineqarsimasut marlunngornermi unnukkut nalunaaqutaq 21:20 Kalaallit Nunaanni Politiit Facebookimi quppernerminni allaaseraat.

Pisoqarfimmi uummarsarneqarsimagaluarput annaanneqarsinnaasimanngillalli.

Toqusut kinaassusaat uppernarsarneqareerpoq ilaqutaasullu kalerrinneqareerlutik. Angutit marluk Nuummeersut tamarmik 22-nik ukiullit ajunaarput.

Ujaarineqartut tamarmik nassaarineqarmata ujaasineq unitsinneqarpoq. 

Pisup alianartup kingorna upalungaarsimasut ikiuisussat Nuummi Qatserisarfimmi piareersimapput. Tarnip pissusaanik ilisimasalimmik oqaloqateqarnissamik pisariaqartitsisut tassunga saaffiginnissinnaapput ikiorneqarlutillu.