Aput tuttutut ilusilersorsinnaaviuk? Apummik ilusilersuisitsisussat peqataasussarsiortut

Aputiminerujussuit 20-t qanorsuaq ilusilersorneqariaannanngorput.

Nuup umiarsuarnut imarpikkoortunut umiarsualivitoqaani Sikukimi apummik ilusilersuisitsisoqassaaq, holdillu 20-ussasut, ilusilersuinissamik aaqqissuussisut tusagassiutinut nalunaarutigaat.

Holdit 20-t peqataasussat sammiviit assigiinngitsut marluk arlaanni apummik marsip ulluisa tallimaanniit arfineq-pingajuata tungaannut ilusilersuitinneqassapput, tassa ilisarnanngitsumik ilusilersuinermi imaluunniit piviusorsiorpalaartumik ilusilersuinermi unammeqataasoqassalluni.

Holdit 13-it siorna peqataapput

Holdit peqataasussat tamarmik immikkut apummik issoqqaarissumik 3x3x3 meteritut angitigisumik tunineqassapput, apummillu ullut sisamaata qeqqata ingerlaneranni ilusilersuisinneqassallutik.

Apummik siorna 2019-imi ilusilersuisoqarmat holdit 13-it peqataapput, apummillu ilusilersukkat alutorineqarluarlutillu soqutigineqarluarput, inuillu tuusintilikkaat Nuummi umiarsualivitoqqamut alakkaallutik.

Apummik ilusilersuinermut peqataaneq akeqanngilaq, snow@sermersooq.gl-imut emailimik allannikkut peqataanissamut nalunaartoqarsinnaavoq.

Sammivinni marlunni taakkunani ajugaasut sapaammi marsip ulluisa arfineq-pingajuanni ualikkut nalunaaqutaq pingasunut akissarsitinneqassapput.

Nuummi apummik 1994-imi siullerpaamik ilusilersuisitsisoqarpoq.