App atorlugu Nuummi taxamik inniminniigit
![](/sites/default/files/styles/image_934x467/public/article_images/taxagut_app.png?itok=8_MWiap7)
Taxagut Nuummiittut Nunatsinni siullersaallutik app-imik pilersitsisimapput, atuisussat taxamik aggeqquseriarlutik oqarasuaatertik angallattagaq atorlugu sumut killinnersoq malinnaavigisinnaaqqullugu.
Misilissimassagunarpat taxassarsiorlutit sianeqattaarlutit.
Taama pisarneq taxaatileqatigiit Taxagut Nuummiittut aaqqiivigilerpaat. Novembarip aallaqqaataanilli app-imik aallertoqarsinnaalersimavoq, atuisussat taxamik aggeqqusisinnaanngorlugit ilutigitillugulu malinnaavigalugu taxa illoqarfiup sukutsitaanut killinnersoq, naggataagullu matuit silataanut uninnissaata tungaanut. Taamaalilluni pisarissersornissaraluit assigiinngitsut pinngitsoorlugit, pisortap Allan Juhlip ima oqaluttuaraa:
- Apeqqutaajuartartoq: Eqqaamavaannga? Taxa aggerpa? Sumununa pisoq? Imaluunniit issip ataani silami utaqqisariaqarpunga... Taava maanna taxap takkunnissaata tungaanut sumut killinnera malinnaavigisinnaanngorpat.
Oqarasuaatip angallattakkap app-ia internet atorlugu taxap sumut killinnera sumiissusersiut GPS iluaqutsiullugu malinnaavigineqarsinnaavoq. Aamma sianersimasup sumiinnera taamaappoq. Sianertup sumiinnini oqaatiginngikkaluarpaguluunniit.
- Taxamik ingerlatsisumut taxaatileqatigiinnullu iluaqutaa tassaavoq, eqqoqqissaartunik naatsorsuuteqaratta, aammalu ingerlatitsisup ornitassani paatsoorsinnaanngimmagu allatulluunniit. Una atortillugu eqqoqqissaartarpoq.
Inuit 2800-ngajaat taxa-app-i maannamut aasimavaat
Tamannalu pisortamut Allan Juhlimut juullimut tunissutitsialattut oqaatigineqarsinnaavoq.
- Nuummi innuttaasut 17.000-iuvugut, Nuummilu smartphonenik atuisut 12.000-it missaanniillutik. Maannamut 2830-it app-erput aasimavaat. Kisitsisit atorlugit naatsorsueqqissaartarneq eqqarsaatigalugu iluatsilluartutut oqaatigisariaqarpoq. Uagullu ilimagaarput sullissilluarnerunermik kinguneqassasoq, sukkanerusumik ajornannginnerusumillu sullissilluarneq, pisortaq Allan Juel oqarpoq.
Nuummi taxatileqatigiit marluupput. Taakkuli assigiinnik Kommuneqarfik Sermersuup aalajangersagaanik akigititaqarput.