Annaassisitta Oqaluffiani apersortitsineq siulleq apriilip 26-at pisussaagaluarpoqAssi: Camilla Dam/KNR

Apersortinnerit coronap eqqorpai

Ukiormanna Nuummi apersortitsinerit junimut kinguartinneqarput. Ukiamut kinguartitseratarsinnaaneq Nuummi palaseqarfiup ilimasaarutigaa

Apersortitsinerit upernaap ilisarnaataasa ilagaat. Ileqqorli taanna nuannersoq nualluussuarmit coronami eqqorneqartunut ilannguppoq.

Apersortittut siulliit assuusersorsimallutik sapaat apriilip 26-at Annaassisitta Oqaluffiani Nuummi apersortittussaagaluarput. Nuummi palaseqarfimmi atuagarsuarnut nalunaarsuilluni palasi Aviaja Rohmann Hansen apersortiffissanut ullunik nutaanik nalunaaruteqarpoq.

- Apriilimi maajimilu apersortiffissat juunimut kinguartinneqarput. Apersortinnissalli ukiamut aamma kinguartinneqarsinnaapput oqartussat killilersuinerat suli sukaterneqassappat, Aviaja Rohmann Hansen oqarpoq.

AAMMA ATUARUK Biskoppi:  Apersortitsinerit avillugit

Inuiaqatigiit matugallarneqarneranni Nuuk eqqungaanersaavoq inuit qulinit amerlanerusut katersuusimanissaat inerteqqutaalermat. Inerteqqut taanna sineriammi oqaluffinnit aamma malinneqarpoq taamalu inuiaqatigiit matoqqatinneqarallarneranni naalagiartitsinerit unitsikkallarneqarlutik.

Internettikkut atuartitsineq

Apersortittoqarnerani aamma angallattoqangaatsiartarpoq ilaqutaasut ikinngutillu ullormi pingaartinneqaqisumi najuukkiartorlutik tikittarmata. Ilaasunilli angallassineq martsip 20-at sapaatit akunnerini marluugallartuni unitsinneqarpoq.

- Sivikinnerpaamik sapaatit akunneri marluk ataannartumik nutaanik tunillatsittoqarsimanngereerpat aatsaat killilersuinissamut inasuteqaatit qasukkarneqarsinnaapput, Nunatta nakorsaanera Henrik L. Hansen oqarpoq.

Nuummi palaseqarfiup apersortitsinissanut ulluliussat nutaat nittartakkamini aammalu facebookimi quppernermini saqqummiunniarpai. Ulluliussalli taakku allanngoqqeratarsinnaapput inuit katersuunnissaannik killilersuineq ilaasunillu angallassinerup unitsinneqarnera sivitsorneqassappata.

Apersortittussanik atuartitsineq internettikkut inuit naapittarfiannut aamma nuunneqaproq. Tussiutit erinaat apersortittussallu ilinnisagassaat assigiinngitsut internettimut ilioqqarneqarput apersortittussat smartphone imaluunniit tablets atorlugit aasinnaaniassammatigit.

Isummersuutit